ҚР Қаржы министрлігінің қызметкерлеріне мемлекеттік наградалар табысталды
8 Наурыз – Халықаралық әйелдер күні қарсаңында Қазақстан Республикасының Қаржы министрі Мәди Такиев елдің қаржы жүйесінің дамуына елеулі үлес қосқан ведомство қызметкерлеріне мемлекеттік наградалар табыстады.
Қазақстан Республикасы Президентінің Жарлығына сәйкес ұзақ жылғы адал еңбегі және кәсіби қызметіндегі қол жеткізген табыстары үшін Мемлекеттік кірістер комитетінің Өндірістік емес төлемдер мен жеке тұлғаларды әкімшілендіру департаментінің Өндірістік емес төлемдерді әкімшілендіру басқармасының басшысы Гүлмира Смағұлова «Құрмет» орденімен наградталды.
Гүлмира Смағұлова мемлекеттік қызметте 34 жылдан бері еңбек етіп келеді. Ол еңбек жолын салық органдарында бастап, бүкіл қызметі барысында негізгі салық құжаттарын әзірлеуге қатысқан, оның ішінде 2001, 2008 және 2017 жылдардағы Салық кодекстері бар. Әріптестері оның жоғары кәсібилігін, көшбасшылық қасиеттерін және өзіне әрі қарамағындағыларға талапшылдығын ерекше атап өтеді.
Мемлекеттік наградамен сондай-ақ Мемлекеттік кірістер комитетінің Орталық кеден зертханасының Физика-химиялық зерттеулер және материалтану сараптамасы бөлімінің бас маманы Зибагул Утина марапатталды. Қазақстан Республикасы Президентінің Жарлығымен ол «Ерен еңбегі үшін» медалімен наградталды. Оның еңбек өтілі – 27 жыл.
Зибагуль Утина өзін кеден ісі саласындағы жоғары білікті сарапшы ретінде көрсете білді. Ол тауарларға күрделі сараптамалар жүргізуді қамтамасыз етеді, кедендік тексерулерге қатысады және Орталық кеден зертханасының әдістемелік базасын дамытуға үлес қосып келеді. Әріптестері оны объективтілігі, принципшілдігі және жоғары жеке тәртібі үшін бағалайды.
«Ерен еңбегі үшін» медалімен сондай-ақ Солтүстік Қазақстан облысы бойынша Қазынашылық департаментінің Тайынша аудандық мемлекеттік қазынашылық басқармасы басшысының орынбасары Наталья Помогаева наградталды.
Наталья Помогаева қазынашылық жүйесінде 28 жылдан астам уақыт еңбек етіп келеді. Ол еңбек жолын аудандық бөлімнің бас бухгалтері болып бастап, қазынашылық жұмысының барлық бағыттарынан өтті және өңірде қазынашылық жүйелерді енгізуге қатысқан. Әріптестері оның мол кәсіби тәжірибесін, принципшілдігін және жас мамандармен білімін бөлісуге әрдайым дайын екенін атап өтеді.
Сонымен қатар «Ерен еңбегі үшін» медалі ҚР Қаржы министрлігінің Мемлекеттік құпияларды қорғау басқармасының басшысы Гүлмира Нұрпейісқа табысталды. Гүлмира Нұрпейіс Қаржы министрлігі жүйесінде 1999 жылдан бері еңбек етеді. Әр жылдары ол салық органдарындағы сыбайлас жемқорлыққа қарсы іс-қимыл мәселелерімен, халықаралық қаржы қатынастарымен айналысып, 2020 жылдан бері Мемлекеттік құпияларды қорғау басқармасын басқарып келеді.
Ол 2021 жылы Мемлекеттік құпияларды қорғау жөніндегі нұсқаулықты әзірлеуге қатысқаны үшін ҚР ҰҚК-нің Құрмет грамотасымен марапатталған. Сондай-ақ «Қаржы қызметінің үздігі» (2023) және «Мемлекеттік қызметтің үздігі» (2020) төсбелгілерінің иегері. Ұжымда оны даналығы, ашықтығы және әзілқойлығы үшін жоғары бағалайды.
Марапатталған әйелдер — елдің қаржы жүйесінің тұрақтылығын қамтамасыз ету жолында күн сайын еңбек етіп жүрген Қаржы министрлігінің үлкен ұжымының бір бөлігі ғана.