Қазақстан мен РФ Калуга облысы ынтымақтастық шараларын кеңейтуде

Калуга облысы, 2021 жылдың 14 мамыры – Қазақстанның Ресейдегі Елшісі Ермек Көшербаев Калуга облысына жұмыс сапарымен барып, оның барысында облыс басшылығымен және өңірдің ірі кәсіпорындарымен бірқатар кездесулер өткізді.

«Ворсино» жүк қалашығының мультимодальдық көлік-логистикалық орталығының «Запад» контейнерлік терминалының ашылу салтанатында Елші Калуга тұрғындарын тек облыс пен Ресей үшін ғана емес, Еуразиялық экономикалық одақ елдері үшін де маңызды оқиғамен құттықтады. Ол өңірдің көлік-логистикалық инфрақұрылымды дамытудағы тәжірибесін Қазақстан үшін қызықты деп атады және КЛО қазақстандық кәсіпорындармен және көлік тораптарымен ынтымақтастық орнататынына үміт білдірді.

Е. Көшербаев Қазақстан мен Ресейдің транзиттік мүмкіндіктері арқылы Еуропа мен Оңтүстік-Шығыс Азияны байланыстыратын «Батыс Еуропа – Батыс Қытай» трансқұрлықтық көлік дәлізінің бөлігі ретінде Калуга облысының логистикалық әлеуетін кеңейтудің ерекше маңыздылығын атап өтті.

Іс-шара аясында отандық дипломат«Ресей почтасының» Бас директоры Максим Акимовпен, сондай-ақ жаңа контейнерлік терминал құрудың бастамашылары мен инвесторларымен, «Дело» компаниялар тобының президенті Сергей Шишкаревпен, «Фрейт Вилладж Калуга Север» ЖШҚ директорлар кеңесінің төрағасы Петр Баскаковпен және «ТрансКонтейнер» компаниясының президенті Александр Исуринмен кездесті.

Калуга облысының губернаторы Владислав Шапшамен екіжақты кездесу аясында тараптар сауда-экономикалық ынтымақтастықтың оң серпінін атап өтті. Қазақстан 2020 жылдың қорытындысы бойынша экспорт көлемі бойынша бірінші орын алып, Калуга облысының негізгі сыртқы сауда серіктестерінің бірі болып қала береді. Соңғы төрт жылда сауда 80%-ке өсті және 180 миллион доллардан асты, ал пандемияның дағдарыс кезеңінде де сауда көлемі азайған жоқ.

Қазақстан Елшісі миллионнан астам адамнан тұратын халқы бар аймақ елді көптеген өнім түрлерімен қамтамасыз ететінін баса айтып, Калуга облысының өндірістік әлеуетін жоғары бағалады. Ол жергілікті биліктің инвестициялық саясаты жоғары халықаралық стандарттарға сәйкес келетіндігін және басқа елдер үшін үлгі бола алатындығын атап өтті.

Тараптар өзара іс-қимылдың барлық саласы бойынша көптеген мәселелерді талқылады. Екіжақты байланыстардың әлеуетін одан ары арттыру үшін жақсы мүмкіндіктер бар екені атап өтілді. Кездесуге қатысушылар инвесторлық қызмет пен өндірістік кооперацияны қоса алғанда, ең маңызды бағыттар бойынша ынтымақтастықты дәйекті түрде дамытуға келісті.

Сапар барысында Е. Көшербаев «Ворсино» индустриялық паркіндегі «ЛАМИНАМАМ» және «Архбум тиссью групп» компанияларының зауыттарында, «Кривское» АҚ агроөнеркәсіптік кәсіпорнында және «ЭТНОМИР» парк-музейінде болды.