Гонконгта ірі қытай өндірушілерінің Қазақстанға сапары талқыланды

Қазақстан Республикасының Гонконгтағы Бас консулы Бауыржан Досманбетов Қытай өндірушілері қауымдастығының Бас атқарушы директоры Ида Нгпен кездесті.

Тараптар Гонконг қытай өндірушілері қауымдастығы делегациясының биыл 19-21 қазанға Қазақстанға жоспарланған сапары сауда-экономикалық өзара іс-қимылды кеңейтуге бағытталғанына назар аударды.

Гонконгтық тарап Қазақстанның инвестициялық әлеуетін зерттеуге және машина жасау, жеңіл және химия өнеркәсібі сияқты басым секторларда ынтымақтастық орнатуға қызығушылық танытып отырғанын растады.

Сапардың негізгі мақсаты – коммерциялық серіктестік орнату, сондай-ақ «hub-to-hub» тұжырымдамасын іс жүзінде жүзеге асыру үшін Қазақстанның мемлекеттік құрылымдарымен және іскер топтарымен тікелей байланыс орнату болып табылады. Бағдарлама аясында бизнес-форум және екіжақты B2B келіссөздерін өткізу жоспарланған.