Мәскеуде Орталық Азия мен Үлкен Еуразиядағы қауіпсіздік мәселелері жөніндегі дөңгелек үстел өтті

2026 жылғы 11 қыркүйекте Мәскеуде "Қазақстан — Орталық Азия — Үлкен Еуразия: жаңа сын-қатерлер жағдайындағы тұрақтылық пен қауіпсіздік" атты дөңгелек үстел өтті. Іс-шара Ұжымдық қауіпсіздік туралы шарт ұйымы Хатшылығының (ҰҚШҰ) бастамасы бойынша ұйымдастырылды.

Талқылауға ҰҚШҰ Бас хатшысы, Ұйымға мүше мемлекеттердің тұрақты өкілдері, ҰҚШҰ Парламенттік ассамблеясының Жауапты хатшысы, сондай-ақ жетекші сарапшылар мен дипломаттар қатысты.

Кездесуге қатысушылар Орталық Азиядағы қауіпсіздіктің түрлі аспектілерін қамтамасыз ету тұрғысынан Қазақстан Республикасында өткен конституциялық реформа мен Құрылтай сайлауына байланысты мәселелерді егжей-тегжейлі талқылады.

Сөз сөйлеу барысында ҰҚШҰ жанындағы ҚР Тұрақты өкілі Марат Сыздықов іс-шараға қатысушыларды елдегі ағымдағы саяси өзгерістер туралы, оның ішінде Қазақстан Республикасының жаңа Конституциясының күшіне енуі туралы, сондай-ақ Құрылтайға сайлау туралы егжей-тегжейлі хабардар етті.

Дөңгелек үстелге қатысушылар ҰҚШҰ-ға мүше мемлекеттердің қауіпсіздігіне әсерін бағалай отырып, халықаралық және өңірлік жағдай бойынша мазмұнды пікір алмасты.

Ұйымға Қазақстаннан басқа Армения, Беларусь, Қырғызстан, Ресей және Тәжікстан да кіретіні белгілі.