Ереванда құқық қорғау саласындағы ынтымақтастық талқыланды

Ереван, 2025 жылғы 22 тамыз – Құқық қорғау саласындағы қазақ-армян өзара іс-қимылын одан әрі кеңейту шеңберінде Қазақстанның Армениядағы Елшісі Болат Иманбаевтың Арменияның Бас прокуроры Анна Вардапетянмен кездесуі өтті.

Сұхбат барысында армян тарапы Қазақстанның қазіргі дамуымен және әртүрлі салалардағы көпқырлы қазақ-армян ынтымақтастығымен, оның ішінде елімізде іске асырылып жатқан және заңның үстемдігін, құқықтық тәртіпті қамтамасыз етуге және адам құқықтарын қорғауға бағытталған ауқымды реформалар бағдарламасымен таныстырылды.

Құқықтық жүйені реформалауда, сондай-ақ заңсыз сатып алынған активтерді мемлекетке қайтару жөніндегі қызмет шеңберінде тәжірибе алмасу мәселелеріне ерекше назар аударылды.

А. Вардапетян Қазақстанда жүргізіліп жатқан реформаларды жоғары бағалап, олардың қазіргі жаһандық сын-қатерлер жағдайындағы өзектілігі мен маңыздылығын атап өтті.

Армениядағы Қазақстанның жекелеген азаматтарымен байланысты мәселелер бойынша, сондай-ақ екі елдің құқық қорғау органдарының қатысуымен өтетін халықаралық іс-шаралар кестесі бойынша пікір алмасылды.