Қазақстан мен Иордания астаналар деңгейінде ынтымақтастықты нығайтуда

Амман, 2025 жылғы 1 маусым – Үлкен Амман муниципалитетінде Қазақстанның Иорданиядағы Елшісі Талғат Шалданбай Амман қаласының Мэрі Юсеф Аш-Шауарбехпен кездесті.

Сұхбат барысында тараптар мәдени және гуманитарлық байланыстарды дамытуға ерекше назар аудара отырып, астаналар деңгейінде Қазақстан мен Иордания арасындағы ынтымақтастықты кеңейту перспективаларын талқылады.

Талқылаудың басты тақырыбы Қазақстан Республикасының Президенті Қасым-Жомарт Тоқаевтың 2025 жылғы ақпан айындағы Иорданияға ресми сапары шеңберінде қол жеткізілген уағдаластықтарды практикалық тұрғыда іске асыру болды. Бірлескен мәдени бастамаларды дайындауға ерекше назар аударылды.

Т. Шалданбай астаналар арасындағы өзара іс-қимыл саяси сенімнің жоғары деңгейіне, сондай-ақ Қазақстан мен Иордания арасындағы мәдени және рухани жақындықты көрсететініне назар аударды.

Ю. Аш-Шауарбех, өз кезегінде, Астанамен белсенді өзара іс-қимылға дайындығын білдіріп, бұл байланыстар халықтардың жақындасуына ықпал ететінін және екі мемлекеттің астаналары арасындағы тұрақты серіктестік үшін берік негіз құратынын атап өтті.

Кездесу қорытындысы бойынша тұрақты диалогты қолдау және Астана мен Амман арасындағы екіжақты ынтымақтастықты практикалық мазмұнмен толықтыруға бағытталған нақты қадамдарды бірлесіп пысықтау туралы уағдаластыққа қол жеткізілді.