Қазақстан Малайзиямен экономикалық ынтымақтастықты нығайтуда
Ипох, 2025 жылғы 12 мамыр – Қазақстанның Малайзиядағы Елшісі Болат Сүгірбаев Малайзияның Перак штатының бас министрі Саарани бин Мохамадпен кездесіп, штат үкіметі қабылдаған стратегиялық даму жоспарларын ескере отырып, ынтымақтастықтың перспективалы бағыттарын талқылады. Атап айтқанда, ауыл шаруашылығы, цифрлық трансформация, халал өнімдері өндірісі, білім беру және туризм сияқты салалардағы жаңа мүмкіндіктер анықталды.
Б. Сүгірбаев Қазақстанның электрондық үкіметті дамытуда әлемдік рейтингтерде жоғары орын алатынын, IT-секторын белсенді түрде дамытып жатқанын және халықаралық серіктестерімен ынтымақтастықты кеңейтуге дайын екенін айтты. Перак штатының үкіметі азық-түлік қауіпсіздігін нығайтуға ерекше назар аударып, қажетті инфрақұрылым құруға инвестиция салуда. Бас министр Саарани бин Мохамад қазақстандық инвесторларды халал индустриясындағы бірлескен жобаларға қосылуға шақырып, штатты өндіріс пен экспорт орталығы ретінде дамыту әлеуетін ерекше атап өтті.
Білім беру және туризм де екі тарап үшін перспективалы бағыттар ретінде кеңінен талқыланды. Экономикада ірі трансұлттық және жергілікті корпорациялардың инвестициялары артып, өнеркәсіптік өндіріс саласы қарқынды дамып келе жатқанын ескере отырып, қазақ дипломаты студенттер алмасу, бірлескен зерттеулер және екі елдің университеттері арасында білім беру бағдарламаларын жүзеге асыру мүмкіндіктеріне назар аударды.
Саарани бин Мохамад, сондай-ақ Перактың туризм саласын дамытуға және туристік ағымдарды белсенді түрде арттыруға дайындығын білдірді.
Кездесу соңында тараптар Перак штатымен экономикалық және мәдени байланыстарды нығайтуға бағытталған нақты бастамаларды пысықтауға келісті.
Сапар барысында Б. Сүгірбаев Малайзияның жетекші автокөлік өндірушісі – «Протон» компаниясы жүзеге асырған «Протон Сити» көпфункционалды қалашығына барды. Сапар барысында қазақ дипломаттары зауыттың жұмысымен және өнім желісінің кеңейтілуіне байланысты даму жоспарларымен танысты. «Протон» компаниясы өндірілетін барлық автокөлік үлгілерін, соның ішінде алғашқы малайзиялық электр көлігін ұсынды.
Кездесу аясында қазақстандық тарап Малайзия компаниясына еліміздің экономикалық әлеуеті мен қолайлы инвестициялық климаты туралы ақпарат берді. Келіссөздер барысында Қазақстан Елшісі мен компания басшылығы «Протон» өнімдерін қазақстандық нарыққа шығару және өндірісті кезең-кезеңімен жергіліктендіру мүмкіндігін талқылады. Тараптар өзара тиімді ынтымақтастықты одан әрі дамытуға мүдделілік білдіріп, жұмыс бағытын жалғастыруға уағдаласты.
Сонымен қатар Елші «Hovid» малайзиялық фармацевтикалық компаниясының басшылығымен кездесті.
Кездесу барысында қазақ дипломаттары еліміздің фармацевтика нарығының мүмкіндіктері мен инвестициялық тартымдылығын таныстырды. Тараптар «Hovid» компаниясы мен Қазақстанның фармацевтикалық және дистрибьюторлық компаниялары арасындағы ынтымақтастық орнату перспективаларын талқылады. Әсіресе өндірісті жергіліктендіру, технологиялар алмасу және өнімді Қазақстан нарығына жеткізу мәселелеріне ерекше назар аударылды.
Елші денсаулық сақтау саласындағы екіжақты ынтымақтастықты дамытуда жоғары әлеует бар екенін атап өтіп, малайзиялық және қазақстандық компаниялар арасындағы тікелей байланыстарды орнатуға жан-жақты қолдау көрсетуге дайын екенін білдірді.
«Hovid» компаниясының атқарушы директоры Сара Хоның айтуынша, экспортқа бағытталған өндірісіне байланысты компания жаһандық ынтымақтастықты белсенді түрде нығайтып, Орталық Азиядағы қатысуын кеңейтуге мүдделі.
Кездесу соңында тараптар тұрақты диалог орнату мен қазақ-малайзиялық қарым-қатынастарды нығайтуға ықпал ететін бірлескен жобаларды іске асыруға өзара мүдделілік бар екенін растады.
«Hovid» – 80 жылдан астам тарихы бар, Малайзиядағы фармацевтика саласының жетекші компанияларының бірі. Компания 400-ден астам өнім түрін, оның ішінде дженериктерді, рецептсіз сатылатын дәрілерді және биологиялық белсенді қоспаларды шығарады. Компания өнімдері әлемнің 50-ден астам еліне экспортталады, бұл оның өнімдерінің жоғары сапасы мен бәсекеге қабілеттілігін көрсетеді. «Hovid» халықаралық GMP және ISO стандарттарына сәйкес сертификатталған заманауи өндірістік қуаттарға ие және ғылыми-зерттеу жұмыстарын белсенді дамытуда.