Қазақстанның сирек кездесетін жануарлар мен өсімдіктер дүниесін қорғау және сақтау бағытындағы күш-жігері Португалияда таныстырылды

Лиссабон, 2025 жылғы 24 сәуір – Қазақстанның Португалиядағы Елшісі Жан Ғалиев Португалияның Табиғатты және орман шаруашылығын қорғау институты (ICNF) директорлар кеңесінің мүшесі Карлуш Албукерке және ұйымның сарапшыларымен кездесті.

Кездесу барысында қазақстандық дипломат еліміздің табиғатты қорғау және қоршаған ортаның сапасын жақсарту бағытында жүзеге асырып жатқан экологиялық жобалары мен бастамалары туралы кеңінен ақпарат берді. Атап айтқанда, «Жасыл Қазақстан» ұлттық экологиялық бастамасымен таныстырылды. Елші Қазақстан тарапынан жойылып бара жатқан жануарлар популяциясын қалпына келтіру және қорғалатын табиғи аумақтарды кеңейту бойынша ауқымды жұмыстар атқарылып жатқанын атап өтті. Қар барысы, киік, Пржевальский-Керқұлан мен жек-дуадақ құсы сынды ерекше түрлердің санын арттыру бағытында елеулі ілгерілеушілік бар екені айтылды.

Кездесуде Қазақстан Республикасының Президенті Қасым-Жомарт Тоқаевтың бастамасымен жүзеге асып жатқан Іле-Балқаш резерватында Тұран жолбарысын қайта жерсіндіру жобасына ерекше назар аударылды.

Португалия тарапы ҚР Президентінің сирек кездесетін жануарларды табиғи мекендеріне қайтару, олардың санын сақтау мен көбейту бағытындағы бастамаларына жоғары баға берді. Атап айтқанда, еліміздің киіктердің санын қалпына келтіру және қорғау бойынша жүргізіп жатқан жұмысы оң пікірге ие болды.

Елші тараптар арасында ерекше жануар түрлерін қорғау және олардың популяциясын көбейту, сондай-ақ табиғатты қорғау саласындағы екіжақты ынтымақтастықты тереңдетуге үлкен әлеует бар екенін атап өтті.

Сұхбат барысында тараптар жойылып бара жатқан жабайы жануарлармен халықаралық сауда туралы Конвенция (CITES) және басқа да табиғатты қорғау саласындағы халықаралық ұйымдар аясында екі ел арасындағы ынтымақтастық мәселелерін талқылады.

Кездесу соңында португалиялық тарап жуық арада Қазақстанға сапармен келуге қызығушылық білдірді.