Прагада Қазақстанның халықаралық қатынастар жүйесіндегі рөлі талқыланды

Прага, 2024 жылғы 30 қазан – Қазақстанның Чехиядағы Елшісі Бақыт Дүйсенбаев «Fontes Rerum» чех зерттеу орталығы ұйымдастырған «Қазақстан қайда бет алып келеді?» тақырыбындағы панельдік пікірталасқа қатысты.

Іс-шараға спикер ретінде ЧР Парламентінің Төменгі палатасының депутаты Вера Адамкова мен «Metropolitan University» профессоры Мартина Варкочкова да қатысты. Модератор ретінде Чехияның бұрынғы өнеркәсіп және сауда министрі Ян Младек болды.

Талқылаудың негізгі бағыты Орталық Азия өңірінің көшбасшысы және жаңа «орта держава» ретінде Қазақстанның болашағына бағытталған. Өз сөзінде Б. Дүйсенбаев аудиторияны Қазақстанның тәуелсіздік жылдарындағы жетістіктерімен, сондай-ақ экономикалық, әлеуметтік және сыртқы саяси салалардағы дамудың өзекті басымдықтарымен таныстырды. Атап айтқанда, ҚР Президенті Қасым-Жомарт Тоқаев бастаған саяси реформаларды ілгерілетудегі прогресс аталып өтті. Экономикалық блоктағы өзгерістер аясында ЖІӨ-ні ұлғайту, экономиканы әртараптандыру, көліктік-логистикалық әлеуетті одан әрі дамыту, жоғары технологиялық өндірістерді ілгерілету, білім беру және туристік хабтар құру бойынша амбициялар белгіленді.

Көпжақты алаңдар шеңберіндегі бастамаларды, жанжалдарды медиациялау және өңірдегі тұрақтылықты қамтамасыз ету жөніндегі күш-жігерді қоса алғанда, Қазақстанның халықаралық аренадағы жетістіктеріне ерекше назар аударылды. Осыған байланысты Елші Қазақстанның БҰҰ Жарғысына және халықаралық құқықтың негізгі қағидаттарына берік ұстанымын атап өтті.

Өз кезегінде В. Адамкова Қазақстан мен Чехияның денсаулық сақтау және медицина саласындағы ынтымақтастық тәжірибесі туралы айтып, оны одан әрі дамытудың перспективалық бағыттары туралы пікірімен бөлісті.

М. Варкочкова Қазақстанның өңірлік қауіпсіздікті қамтамасыз етудегі маңызды рөлін және энергия көздері мен сыни шикізат тапшылығы, сондай-ақ Еуропа мен Азия арасындағы көліктік байланыс контекстінде еліміздің өсіп келе жатқан маңызын атап өтті.

Іс-шара соңында спикерлер аудиторияның сұрақтарына жауап берді.