Әзербайжан мектеп оқушылары Қазақстанның мәдениеті мен дәстүрлері туралы айтып берді

Баку, 2024 жылғы 16 ақпан – Қазақстанның Әзербайжандағы Елшілігінің қатысуымен «Kaspi» халықаралық мектебінде әлем елдерінің мәдениеттеріне арналған іс-шара өтті.

Іс-шараның басында мектеп оқушылары салтанатты шеру барысында бір-бірін қошеметтеп, Қазақстан, Түркия, АҚШ, Ұлыбритания, Ресей, Украина, Канада, Франция, Мысыр, Жапония, Оңтүстік Африка Республикасы және т.б. елдердің ұлттық киімдерін ұсынды.

Шараның негізгі бөлігі оқу кабинеттерінде өтті. Мектеп оқушылары тақырыптық көрмелерді ұйымдастырып, әлем елдерінің мәдениеті мен дәстүрлері туралы презентацияларды өткізді.

Атап айтқанда, бірінші сынып оқушылары іс-шара қонақтарын қазақ тілінде қарсы алып, Қазақстанның ұлттық дәстүрлері мен көрікті жерлері туралы айтып берді, Қазақстан туралы бейнеролик көрсетті және «Қара жорға» қазақ халық биін орындады.

Сонымен бірге іс-шара аясында Астана қаласының № 26 мектеп-гимназиясының оқушыларымен бейнеқоңырау өтті. Бейнебайланыс барысында қазақ оқушылары әзербайжан балаларына сәлем беріп, оларға қазақ күйін арнады.