Израильдік компания Қазақстанда халықты ауыз сумен қамтамасыз ету жөніндегі жобаларды іске асыруға қатысуға ниетті

Тель-Авив, 2023 жылғы 24 ақпан – Қазақстанның Израильдегі Елшісі Сатыбалды Бұршақов суды тазарту жөніндегі шешімдер саласындағы әлемдік көшбасшылардың бірі болып табылатын «IDE Technologies» израильдік компаниясына барды.

Кездесуде «IDE Technologies» компаниясының вице-президенті Михаел Трэмер қазақстандық дипломатты компанияның суды тұщыландыру қондырғылары мен өнеркәсіптік су тазарту құрылыстарын жобалау, салу және пайдалану жөніндегі мүмкіндіктерімен таныстырды.

С. Бұршақов тұрғындарды сапалы ауыз сумен қамтамасыз етудің өзектілігін атап өтіп, осы саладағы ынтымақтастықтың маңызды әлеуетіне назар аударды. Осы орайда Қазақстан Президенті Қасым-Жомарт Тоқаев қазіргі заманғы технологияларды енгізе отырып, Маңғыстау облысының тұщыландыру кәсіпорындарын жаңғырту жөніндегі жобаларға түйінді мән беретінін хабарлады.

Келіссөздердің жалғасында «Маңғыстау атом энергетикалық комбинаты (МАЭК)» ЖШС делегациясының Израильге сапары ұйымдастырылды. «IDE Technologies» басшылығымен кездесуде тараптар теңіз суын тұщыландыру технологиялары саласындағы ынтымақтастықты дамытуға қызығушылық танытты, сондай-ақ тұщыландыру қондырғыларын пайдалану бойынша тәжірибе алмасты. Қазақстандық делегация кері осмос технологиясы бойынша жұмыс істейтін Хадера қаласындағы «IDE Technologies» тұщыландыру кешенінің өндірісімен танысты.

«МАЭК» ЖШС бас директорының орынбасары А. Үйкекбаев израильдік компанияның бұрын сатып алынған тұщыландыру қондырғыларын пайдаланудың оң тәжірибесін атап өтті. Өз кезегінде израильдік компания Маңғыстау облысы әкімдігінің жобасы бойынша халықтың мұқтаждықтары үшін қуаттылығы тәулігіне 24 мың м3 ауыз су тұщыландыру жабдығын жеткізуді ұйымдастыруға ниет білдірді.

Анықтама: 2007 жылы «IDE Technologies» компаниясы «МАЭК» ЖШС аумағында қуаты тәулігіне 12 мың м3 болатын екі тұщыландыру қондырғысын пайдалануға берді.