Грузиялық аудитория Қазақстанның жаңа реформалары және бастамаларымен танысты
Тбилиси, 2022 жылғы 10 қараша – Грузияның жетекші жоғары оқу орнындарының бірі Сухуми мемлекеттік университетінде Қазақстандағы саяси және экономикалық өзгерістерге, сондай-ақ алдағы президенттік сайлауға арналған дөңгелек үстел өтті.
2020 жылы қазақтың ұлы ақыны, жазушысы мен ойшылының 175 жылдық мерейтойына орай ашылған Абай Құнабайұлы атындағы аудиторияда университеттің студенттері, профессор-ұстаздар, саясаттанушылар мен Грузияның жетекші сарапшылары Қазақстанның жаңа саяси-экономикалық реформаларымен танысты. ҚР Президенті Қасым-Жомарт Тоқаевтың бастамасымен және ілгерілетуімен Әділетті Қазақстан құру тұжырымдамасы туралы грузин тілінде арнайы жасалған ақпараттық фильм көрсетілді.
Сухуми мемлекеттік университетінің ректоры, профессор, саясаттану ғылымдарының докторы, дипломат Зураб Хонелидзе өз сөзінде әлемдегі геосаяси ахуалдың даму үрдісін және әлемдік үлгінің көпполярлы моделін қалыптастыруды ескере отырып, Қазақстандағы саяси қайта құрудың уақтылылығын атап өтті. З.Хонелидзе мәлімдегендей, ол «Қазақстанда алдағы президенттік сайлау сәтті өтетініне сенімді, Грузия, достас ел ретінде қазақ халқының таңдауын құрметтейді және қолдайды».
Саясаттану ғылымдарының докторы, Кавказ халықаралық университетінің профессоры Вахтанг Маисайдың пікірінше, Қазақстанның өңірлік держава болудың нақты алғышарттары бар, ол көпвекторлы сыртқы саясаттың прагматикалық моделімен және әлемдегі геосаяси және геоэкономикалық жағдайдың турбуленттілігіне бейімделетін «байсалды» экономикамен нығайтылады.
Грузияның еңбек сіңірген журналисті, саясаттанушы Бадри Начкебийдің бағалауы бойынша, реформалар тәуелсіз Қазақстан тарихында жаңа кезең ашады. «Халық үніне құлақ асатын мемлекет» тұжырымдамасы, «Қазақстан халқына» қорының жұмысы, монополиясыздандыру бойынша қабылданған шаралар басқа елдер, соның ішінде Грузия үшін үлгі бола алады.
Дөңгелек үстелге қатысушылар Мемлекет басшысының Қазақстанды одан әрі саяси, экономикалық және институционалдық жаңғырту жөніндегі батыл шешімдеріне қызығушылық танытты, сондай-ақ реформалардың әлеуметтік аспектісін атап өтіп, халықтың әл-ауқатын арттырудың маңыздылығына назар аударды.
Талқылау барысында дипломатиялық қатынастарына 30 жыл толған Қазақстан-Грузия ынтымақтастығының жай-күйі мен перспективалары талқыланды. Тараптар Қазақстандағы жаңа саяси және экономикалық реформалар өзара іс-қимылдың барлық салаларында қазақ-грузин қатынастарын жандандыратынына сенім білдірді.