Азия елдері коронавирустан кейінгі кезеңде ынтымақтастықты нығайтуға ниетті

Азия елдері коронавирустан кейінгі кезеңде  ынтымақтастықты нығайтуға ниетті

Нұр-Сұлтан, 2021 жылдың 21 қаңтары - Қазақстан Премьер-Министрінің орынбасары - Сыртқы істер министрі Мұхтар Тілеуберді Түркия төрағалығының бастамасымен онлайн форматта өткен Азиядағы ынтымақтастық жөніндегі диалогқа (АЫД) мүше-мемлекеттердің сыртқы саяси ведомстволары басшыларының 17-ші отырысына қатысты.

Іс-шара барысында М.Тілеуберді коронавирустан кейінгі кезеңде инвестицияларды тарту, бизнесті, сауда мен туризмді дамыту саласындағы практикалық өзара іс-қимылды нығайтудың жолдарын бірлесіп іздеудің маңыздылығын атап өтті. Қазақстан тарапы Азиядағы өзара ықпалдастық және сенім шаралары жөніндегі кеңестің төрағасы ретінде, Азия және Таяу Шығыс мемлекеттерінің экономикалық дамуы үшін осы құрылымдардың кооперативтік әлеуетін неғұрлым кеңінен пайдалану мақсатында, АӨСШК және АЫД Хатшылықтары арасында ынтымақтастық орнатуды ұсынды.

Қатысушылар өңірлік дамудың өзекті мәселелерін талқылады және АЫД шеңберінде ынтымақтастықты одан әрі арттыру үшін күш-жігерін салуға келісті.

Іс-шара қорытындысы бойынша Анкара декларациясы қабылданды.

АЫД - Азиядағы саяси және экономикалық ынтымақтастықтың түрлі бағыттары бойынша диалогқа, консультацияларға, шешімдер қабылдауға және консенсус негізінде шараларды жүзеге асыруға арналған мемлекетаралық форум. 2002 жылғы 19 маусымда құрылған. Қазіргі уақытта Азия мен Таяу Шығыстың 35 мемлекеті АЫД мүшесі болып табылады. Қазақстан форумға 2003 жылы қосылды.