Brexit-тен кейінгі Ұлыбританияның ДСҰ-дағы алғашқы сауда саясатына шолу Қазақстанның төрағалығымен өтті
Женева, 2025 жылғы 30 қазан – 2025 жылғы 28 және 30 қазанда Дүниежүзілік сауда ұйымы (ДСҰ) аясында Ұлыбритания мен Солтүстік Ирландия Құрама Корольдігінің тәуелсіз мүше ретінде алғашқы Сауда саясатына шолу отырысы өтті. Отырысқа Қазақстан Республикасының ДСҰ жанындағы Тұрақты өкілі Қайрат Төребаев төрағалық етті.
Ұлыбритания делегациясын халықаралық сауда жөніндегі министр Сэр Крис Брайант басқарды. Сонымен қатар, ДСҰ жанындағы Ұлыбританияның Тұрақты өкілі Кумар Айер және Лондоннан келген үкімет өкілдері қатысты.
Шолу барысында Brexit-тен кейінгі Ұлыбританияның негізгі сауда және экономикалық саясаты қаралды. Атап айтқанда, жаңа кедендік тариф жүйесінің (UK Global Tariff) қалыптасуы, еркін сауда туралы жаңа келісімдердің жасалуы, Тынық мұхиты елдерінің жан-жақты және прогрессивті серіктестік туралы келісіміне (CPTPP) қосылуы және «Reform by Doing» бастамасы аясында ДСҰ реформасына белсенді қатысуы атап өтілді.
ДСҰ мүшелері Ұлыбританияның көпжақты сауда жүйесіндегі ашықтық, болжамдылық және сындарлы ұстанымын жоғары бағалады. Елдің экономикасы тұрақтылығын сақтап, әлем бойынша алтыншы орынға ие екені және тауарлар мен қызметтердің саудасы ЖІӨ-нің шамамен 62%-ын құрайтыны атап өтілді.
ДСҰ баяндамасында 2024 жылы Ұлыбритания орташа импорттық тариф мөлшерін 6,3%-дан 4,8%-ға дейін төмендетіп, қызмет көрсету саласындағы ырықтандыруды, кедендік рәсімдерді цифрландыруды және «жасыл» стандарттар мен климаттық бастамаларды енгізуді жалғастырғаны көрсетілген.
Делегаттар 2025 жылғы Ұлыбританияның жаңа Сауда стратегиясына ерекше назар аударды. Бұл стратегия тұрақты, инклюзивті және инновациялық экономикалық өсуді сауда арқылы ілгерілетуге бағытталған. Сондай-ақ жаңартылған Индустриялық стратегия инвестицияларды ынталандыру мен шағын және орта бизнесті қолдауға бағытталған.
Көптеген елдер, соның ішінде Достастыққа (Commonwealth of Nations) және Еуропаға мүше серіктестер, Ұлыбританияның тұрақты даму, цифрлық сауда, ШОБ қатысуы мен гендерлік теңдік мәселелерін ілгерілетудегі көшбасшылығын жоғары бағалады. Сондай-ақ елдің қызмет көрсету, инвестициялар және электрондық сауда жөніндегі ДСҰ бастамаларына белсенді қатысатыны атап өтілді.
Кездесу соңында Тұрақты өкіл Қайрат Төребаев Brexit-тен кейінгі Ұлыбританияның алғашқы Сауда саясатына шолуы тарихи маңызды кезең болғанын атап өтті. Бұл елдің сауда жүйесінің эволюциясын және көпжақты саудадағы ашықтық пен сенімді нығайтудағы белсенді рөлін көрсетеді.
ДСҰ-дағы Сауда саясатына шолу тетігі әлемдік сауданың ашықтығын, болжамдылығын және тұрақты дамуын қамтамасыз етудің негізгі құралы болып қала береді.
Келесі шолу 2025 жылғы қараша айында өтеді және Гватемалаға арналмақ.