Қазақстан БҰҰ-ның киберқылмыс жөніндегі Арнайы комитетінің сессиясына қатысты

Вена, 2026 жылғы 26-30 қаңтар - Қазақстан делегациясы БҰҰ-ның киберқылмысқа қарсы конвенциясын әзірлеу жөніндегі Арнайы комитеттің сессиясына қатысты.

Вена қаласында мемлекеттердің, халықаралық және өңірлік ұйымдардың, сондай-ақ азаматтық сараптамалық қоғам институттарының өкілдерін біріктірген сессия БҰҰ-ның киберқылмысқа қарсы конвенциясына қатысушы мемлекеттер конференциясының Процедуралық ережелерін дайындауға арналды.

Жалпы отырыстар барысында Қазақстан Республикасы Ұлттық қауіпсіздік комитетінің Киберқылмысқа қарсы іс-қимыл жөніндегі бөлімшесінің басшысы Азамат Қалиасқаров Қазақстанның Конвенцияның мақсаттары мен қағидаттарына берік екенін растап, барлық қатысушы мемлекеттердің мүдделерін ескеретін теңгерімді, ашық және инклюзивті процедуралық ережелерді әзірлеудің маңыздылығын атап өтті.

Сессия аясында Қазақстан делегациясының БҰҰ-ның Есірткі және қылмыс жөніндегі басқармасының Киберқылмыс және технологиялар бөлімінің басшысы Глен Причардпен кездесуі өтті. Кездесу барысында Қазақстан мен БҰҰ ЕҚБ арасындағы өзара іс-қимылдың өзекті мәселелері, сондай-ақ БҰҰ-ның киберқылмысқа қарсы конвенциясының күшіне енуі мен оны кейіннен іске асырудың келесі кезеңдеріне қатысты ұйымдастырушылық және процедуралық мәселелер талқыланды.