ҚР Сыртқы істер министрлігінің Үрімші қ. Паспорттық-визалық қызметінің Кеңесші–Басшысының «China Unicom» телекоммуникациялық компаниясы басшылығымен өткізген жұмыс кездесуі туралы

Үрімші қ., 2025 жылғы 29 шілде – ҚР СІМ Үрімші қ. Паспорттық-визалық қызметінің Кеңесші–Басшысы Д.Айменов Шыңжаңдағы «China Unicom» телекоммуникациялық компаниясы бөлімінің басшылығымен жұмыс кездесуін өткізді.

Кездесу барысында тараптар телекоммуникациялық қызметтердің сапасын арттыру, сондай-ақ Қазақстан мен Қытай арасындағы цифрлық ынтымақтастық бағытындағы өзара іс-қимылды кеңейту мәселелерін талқылады.

Тараптар Шыңжаң өңіріндегі Қазақстан Республикасының ресми мекемелерінің қызметін сенімді, қауіпсіз әрі тұрақты байланыспен қамтамасыз ету мақсатында одан әрі диалог жүргізуге дайын екендіктерін білдірді.

Анықтама: «China Unicom» — жарғылық капиталы 200 млрд юаньнан асатын Қытайдың ірі мемлекеттік телекоммуникациялық компанияларының бірі. Компания бесінші және алтыншы буындағы (6G) байланыс желілерін дамытумен белсенді айналысады, сондай-ақ терагерцтік байланыс пен жерүсті және жерсеріктік инфрақұрылымды біріктіру бойынша ҚХР-дың ұлттық бағдарламаларына қатысады. «China Unicom» Қытайда шетелдік және шетелдердегі дипломатиялық өкілдіктерге «China Unicom Global» еншілес құрылымы арқылы байланыс қызметтерін көрсетеді.