Elchi B. Atamkulov O‘zbekiston Respublikasi Investitsiyalar, sanoat va savdo Vaziri L. Qudratov bilan uchrashdi

Toshkent, 2026-yil 30-yanvar – Qozog‘iston Respublikasining O‘zbekiston Respublikasidagi Favqulodda va Muxtor Elchisi B. Atamkulov hamda O‘zbekiston Respublikasining investitsiyalar, sanoat va savdo vaziri L. Qudratov o‘rtasida uchrashuv bo‘lib o‘tdi.

Tomonlar Qozog‘iston Respublikasi Prezidenti K. To‘qayevning O‘zbekiston Respublikasiga amalga oshirgan yaqindagi davlat tashrifi yakunlarini, shuningdek uning natijalari bo‘yicha erishilgan kelishuvlarni amalga oshirish va qabul qilingan topshiriqlar ijrosini ta’minlash rejalari muhokama qilganini qayd etdilar.

Joriy yilga mo‘ljallangan tadbirlar jadvaliga, jumladan oliy va yuqori darajadagi aloqalarga, shuningdek qo‘shma hukumatlararo va tarmoq hamkorlik mexanizmlarining rejalashtirilgan yig‘ilishlariga alohida e’tibor qaratildi, erishilgan kelishuvlar ijrosining borishini monitoring qilishga urg‘u berildi.

Uchrashuv davomida tomonlar ikki tomonlama savdo-iqtisodiy kun tartibining keng doiradagi masalalarini, jumladan mamlakatlar o‘rtasidagi o‘zaro savdoning holati va rivojlanish istiqbollarini, shuningdek investitsiyaviy hamkorlik va o‘zaro investitsiyalarni rag‘batlantirish bo‘yicha amaliy choralarni muhokama qildilar.

2030-yilga qadar ikki tomonlama tovar ayirboshlash hajmini 10 mlrd AQSh dollariga yetkazishga qaratilgan Qo‘shma dastur ijrosining borishi alohida ko‘rib chiqildi, jumladan aniq loyihalarni amalga oshirish va savdo-iqtisodiy aloqalarni qo‘llab-quvvatlash mexanizmlari muhokama etildi. Shu doirada “Markaziy Osiyo” xalqaro sanoat kooperatsiyasi markazini rivojlantirish masalalari, shuningdek o‘zaro savdoni ilgari surishning asosiy vositalaridan biri sifatida “UzKazTrade” qo‘shma savdo kompaniyasi faoliyati muhokama qilindi.

Tomonlar, shuningdek, mahsulotlarning muvofiqligini baholashni o‘zaro tan olish masalalari yuzasidan fikr almashdilar, tovar ayirboshlash hajmini yanada oshirish maqsadida texnik to‘siqlarni bartaraf etish va tartibga solish yondashuvlarini uyg‘unlashtirish muhimligini ta’kidladilar.

Ma’lumot uchun: O‘zbekiston Respublikasi Investitsiyalar, sanoat va savdo vazirligi ma’lumotlariga ko‘ra, 2025-yil yakunlariga binoan tovar ayirboshlash hajmi 4,97 mlrd AQSh dollariga yetib, 2024-yilning mos davriga nisbatan 11 foizga oshgan. Qozog‘istonning O‘zbekistonga eksporti 3,43 mlrd AQSh dollarini, importi esa 1,54 mlrd AQSh dollarini tashkil etdi. 2023-yil yakunlariga ko‘ra, o‘zaro tovar ayirboshlash hajmi qariyb 4,1 mlrd AQSh dollarini tashkil etgan bo‘lsa, 2024-yilda u taxminan 4,5 mlrd AQSh dollarigacha oshdi.

Uchrashuv doirasida Hududlar rahbarlari kengashining birinchi yig‘ilishini, shuningdek Qozog‘iston–O‘zbekiston Ishbilarmonlar kengashining navbatdagi yig‘ilishini o‘tkazish bilan bog‘liq tashkiliy masalalar ko‘rib chiqildi.

Uchrashuv yakunida tomonlar Qozog‘iston va O‘zbekiston o‘rtasidagi strategik sheriklik va ittifoqchilikni yanada chuqurlashtirishga o‘zaro intilishini tasdiqladilar.