Еуропа Кеңесі Қазақстан Президентінің адам құқықтары саласындағы бастамаларын қолдайды

СТРАСБУРГ, 23 маусым 2021 жыл - Еуропа Кеңесінің Сыртқы байланыстар дирекциясының Басшысы Золтан Таубнерге Қазақстан Республикасының Президенті Қасым-Жомарт Тоқаевтың адам құқықтары саласындағы қабылданып жатқан шаралары туралы егжей-тегжейлі ақпарат берілді.

Еуропа Кеңесінің сыртқы саясат органының басшысы елде жүргізіліп жатқан ішкі саяси реформалар мен мемлекеттің тұрақты дамуына ықпал ететін жаңа тиімді бастамаларға жоғары баға берді. «Бұл Қазақстанмен бірлескен бірқатар бағдарламаларды жүзеге асырудағы Еуропа Кеңесі үшін керемет жаңалық», - деп атап өтті З.Таубнер.

«Президент Қ.Қ.Тоқаевтың осы Жарлығы мен қабылданған Жоспардың айрықша маңыздылығы - бұл іске асыру механизмін, сондай-ақ белгілі бір нәтижелер туралы мерзімді есеп беруді көздейді», - деді Еуропа Кеңесінің Сыртқы байланыстар жөніндегі дирекциясының басшысы.

Жоспарда көрсетілген басымдықтардың ішінде ол үкіметтік емес ұйымдармен өзара іс-қимылдың тиімділігін арттыру және әйелдерге қатысты кемсітушілікті жою сияқты бағыттарды жүзеге асырудың маңыздылығын атап өтті.

З.Таубнер Еуропа Кеңесінің Қазақстан Республикасымен 2019-2022 жылдарға арналған тату көршілік ынтымақтастық бағдарламасының сәтті жүзеге асырылуын құптады және біздің елімізбен тек Орталық Азияда ғана емес, сонымен қатар Магриб және Таяу Шығыс сияқты өңірлерде жұмыстың оң үлгісінің маңыздылығын атап өтті. Бұл ұстанымды Еуропа Кеңесінің барлық мүшелері де қолдайды.