2022 жылғы 16 желтоқсан. Бүгін Қазақстан Тәуелсіздігінің 31 жылдығын атап өтуде. 1991 жылғы 16 желтоқсанда Қазақстан Республикасының тәуелсіздігі туралы заң қабылданған болатын.
Қазақстан Президенті Қасым-Жомарт Тоқаев Қазақстан халқын мемлекеттік мерекемен құттықтады.
«1991 жылғы 16 желтоқсан – төл тарихымыздағы мерейлі белес. Бұл – егемен ел болуды аңсаған ата-баба арманы ақиқатқа айналған ұлы күн» - деді Мемлекет басшысы құттықтауында.
«Тәуелсіздік күнінің айрықша мән-мағынасы бар. Азаттық үшін арпалысқан ұлт перзенттерін ел жадында мәңгі сақтау – қасиетті парызымыз. Олардың отаншылдық қасиеті – бүгінгі және болашақ ұрпаққа әрдайым үлгі-өнеге».
Президент Қ.Тоқаев Қазақстанның ауқымды саяси және экономикалық реформаларды қолға алып, мемлекетімізді жаңғыртудың жаңа кезеңіне қадам басқанын атап өтті.
«Егемен елімізді одан әрі дамыту – алдымызда тұрған басты міндет. Біз осы жолда аянбай еңбек етуіміз қажет. Сонда ғана Қазақстан қуатты мемлекетке айналады».