Алматыда Қазақстан-Италия сауда үйі ашылды
Алматы қаласы, 2026 жылғы 20 ақпан – Ашылу рәсіміне Қазақстан Республикасының Сауда және интеграция министрі Арман Шаққалиев, Италияның Қазақстандағы Елшісі Антонелло ди Риу, Италия-Қазақстан сауда қауымдастығының президенті Марко Беретта қатысты. Іс-шараға онлайн-форматта Қазақстанның Италиядағы Елшісі Ерболат Сембаев, Кәсіпкерлік және «Made in Italy» министрінің орынбасары Валентино Валентини, Италия Парламентінің мүшесі, Сенатор Джулио Терци ди Сант’Агата, Депутаттар палатасының мүшесі Марко Ознато және басқалар қатысты. Ашылу рәсімінде Италия Сыртқы істер және халықаралық ынтымақтастық министрінің орынбасары Эдмондо Чиреллидің құттықтау хаты оқылды.
Арман Шаққалиев Қазақстан мен Италия арасындағы сауда, инвестиция және өнеркәсіп саласындағы берік серіктестікке назар аударды. Италия Қазақстанның Еуропадағы негізгі серіктестерінің бірі болып саналады. Сауда үйі компаниялар үшін жұмыс алаңына айналмақ. Мұнда кәсіпкерлер кеңес алып, серіктестерін тауып, бірлескен жобаларға қатысып, тәжірибе алмастыра алады. Сауда үйі экспорт пен инвестицияны қолдауға бағытталған. Ол кәсіпорындарға бірлескен кәсіпорындар мен өнеркәсіп жобаларын құруға көмектеседі. Мұнда өндірістік ынтымақтастықты орнатып, технологиялармен тәжірибе алмасуға болады. Орталық Made in Italy белгісі бар өнімдерді ілгерілетуге және Қазақстанның шикізатқа тәуелсіз экспортын дамытуға ықпал етеді.
ҚР Италиядағы Елшісі Ерболат Сембаев сауда үйінің ашылуы қазақстан-итальян әріптестігінің стратегиялық сипатының жарқын дәлелі екендігін және бүгінгі оқиғаға жоғары саяси және институционалдық мәртебе беретінін атап өтті.
«Италия дәстүрлі түрде Қазақстанның Еуропалық одақ елдері арасындағы негізгі сауда серіктесі және тауар айналымы көлемі бойынша жетекші серіктестердің үштігіне кіреді. Сауда үйі итальяндық өнімдер мен технологияларды Орталық Азияның қарқынды дамып келе жатқан нарығына ілгерілетуге, сондай-ақ қазақстандық шикізаттық емес экспорттың және Италия мен Еуропалық одақ нарығындағы инвестициялық жобалардың қатысуын кеңейтуге ықпал етеді деп үміттенемін», - деді Е.Сембаев.
Өзінің құттықтау хатында Италия Сыртқы істер және халықаралық ынтымақтастық министрінің орынбасары Э.Чириелли Қазақстан-Италия сауда үйі Қазақстан мен Орталық Азияға мүдделі итальяндық компаниялар мен серіктестер үшін, сондай-ақ Италиямен ынтымақтастық іздеп жүрген қазақстандық компаниялар үшін негізгі платформа болатынына сенім білдірді.
«Италия Қазақстан үкіметі 2022 жылы бастаған реформаларды бағалайды және қолдайды. Бұл жол Президент Тоқаев жариялаған «Жаңа Қазақстанды», яғни өңірлік интеграция мен жаһандық дипломатияны табысты үйлестіруге қабілетті нағыз байланыс және экономикалық өркендеу орталығын құруға әкелетініне сенімдімін», - делінген хатта.
Италия Сенатының депутаты Дж. Терци ди Сант'Агата Еуропа мен Азияның қиылысында орналасқан Қазақстан маңызды стратегиялық рөл атқаратынын атап өтті. Саяси тұрақтылық, табысты реформалар, серпінді қоғам және кәсіпкерлік рух бұл ұлы елді Италия үшін де, Еуропалық одақ үшін де маңызды серіктес етеді.
«Сауда үйі тек институционалды орын ғана емес, сонымен қатар инновациялар, кәсіпкерлік және ұзақ мерзімді ынтымақтастық алаңы болмақ. Италия мен Қазақстанның берік қатынастары бар; ондаған жылдар бойы бұл қатынастар энергетикадан бастап инфрақұрылым, өндіріс, агроөнеркәсіптік кешен және мәдени алмасу саласындағы барған сайын әртараптандырылған ынтымақтастыққа дейінгі түрлі салаларды қамтыды. ЕО аясында Италия, әрине, Қазақстанның негізгі сауда серіктестерінің бірі», - деп атап өтті итальяндық сенатор.
Италия Кәсіпкерлік және «Made in Italy» министрінің орынбасары В.Валентини Қазақстан мен Италия арасындағы елеулі әлеуетті атап өтті.
«Біздің елдеріміз арасындағы қарым-қатынас берік, бірақ біздің елдеріміз арасындағы ынтымақтастықты нығайтуда әлі де үлкен әлеует бар. Қазақстан-Италия сауда үйі дәл осы мақсатта құрылды: экспортты ілгерілетіп қана қоймай, жалпы өсуге ықпал ететін итальяндық және қазақстандық бизнес-құрылымдар арасындағы байланыс үшін тұрақты платформа ұсынатын болады. Бұл «Италияда жасалған» логикасынан асып түсетін және «Италиямен бірге жасалған» бағытында дамитын тәсіл. Сауда үйінің зор әлеуеті осында», - деді В.Валентини.
Сауда үйінің инфрақұрылымына іскерлік кездесулер, келіссөздер, конференциялар мен презентацияларға арналған қондырғылар кіреді. Мұнда онлайн өзара әрекеттесу мен гибридті іс-шараларға арналған цифрлық шешімдер жұмыс істейді. Бизнесті қолдау үшін алаңда Қазақстанның даму институттарының ақпараттық нүктелері орналасады. Олар ынтымақтастық мүмкіндіктері мен мемлекеттік қолдау шаралары туралы өзекті ақпарат береді.
Сауда үйінің инфрақұрылымына іскерлік кездесулер, келіссөздер, конференциялар мен таныстырылымдарға арналған бөлмелер кіреді. Мұнда онлайн байланыс пен гибридтік іс-шараларды ұйымдастыруға арналған цифрлық шешімдер жұмыс істейді. Кәсіпкерлікті қолдау үшін орталықта Қазақстанның даму институттарының ақпараттық нүктелері орналастырылады. Олар ынтымақтастық мүмкіндіктері және мемлекеттік қолдау шаралары туралы өзекті ақпарат береді.
Суреттер: ҚР СИМ