Қазақстанның Италиядағы Елшілігінде қазақстандық балаларды асырап алған итальяндық отбасылармен кездесу өтті

2025 жылғы 26 маусымда Қазақстан Республикасының Италия Республикасындағы Елшілігінде Елші Ерболат Сембаевтың Қазақстанда асырап алынған балаларды тәрбиелеп отырған итальяндық отбасылармен кездесуі өтті. Іс-шараға 14 пен 24 жас аралығындағы қазақстандық жастар тәрбиеленіп отырған алты итальяндық отбасы қатысты.

Кездесудің мақсаты асырап алынған балаларды тарихи отанының тарихымен, мәдениетімен және дамуымен таныстыру болды. Балалар қазақ халқының салт-дәстүрі, мәдениеті, тілі, ұлттық тағамдары, сондай-ақ Қазақстанның ғылым, технология, экология және халықаралық ынтымақтастық саласындағы бүгінгі таңдағы жетістіктері туралы мол мағлұмат алды.

Мәдени рәміздер болып саналатын киіз үйлер, домбыра, Наурыз мейрамы, сондай-ақ қазақтың ұлы ойшылы Абайдың философиясы туралы әңгімелер жасөспірімдердің ерекше қызығушылығын туғызды. Әр қатысушыға Абай Құнанбаевтың итальян тіліндегі "Қара сөздер" кітабы табыс етілді. Балалар түрлі сұрақтар қойып, қазақ халқының салт-дәстүріне, мерекелеріне, музыкалық аспаптарына қызығушылық танытты.

Ересек қатысушылар, соның ішінде студенттер Қазақстанның қазіргі заманғы әлеуметтік-экономикалық дамуына, ЖІӨ-нің өсуі, инвестициялық ахуал, IT-сектор және халықаралық ынтымақтастық мәселелеріне қызығушылық танытты. Елші балаларға елдің қазіргі жағдайы, табысты реформалар, экологиялық күн тәртібі және Италиямен жаңа серіктестік жобалары туралы егжей-тегжейлі айтып берді.

Елшілік итальяндық отбасыларға балалардың мәдени мұрасымен байланысын сақтауға деген сүйіспеншілігі, қамқорлығы және ашықтығы үшін ризашылығын білдірді. Мұндай кездесулер Қазақстан мен Италия арасындағы гуманитарлық байланыстарды нығайтуда, өзара сыйластықты қалыптастыруда және мәдениетаралық диалог үшін негіз құруда маңызды рөл атқаратыны ерекше атап өтілді.

Қазақстанның Италиядағы Елшілігі қарым-қатынас, оқыту және мәдени алмасу үшін платформа құра отырып, осындай бастамаларды жалғастыруға ниетті.