Қазақстан делегациясы Ар-Рияд қаласында өткен «28th World investment conference» іс-шарасына белсенді қатысты

Ар-Рияд, 2024 жылғы 27 қараша – 2024 жылғы 25-27 қараша аралығында Сауд Арабиясы Корольдігінің астанасы Ар-Рияд қаласында «28th World investment conference» халықаралық инвестициялық форумы өтті.

Іс-шараға қазақстандық тараптан АХҚО Басқарушысы Ренат Бектұров, ҚР Сыртқы істер министрінің орынбасары Әлібек Қуантыров, Қазақстанның Сауд Арабиясындағы Елшісі Мадияр Меңілбеков, «Kazakhinvest» АҚ Төрағасының орынбасары Мадияр Сұлтанбек және т. б. қатысты.

АХҚО басқарушысы Р. Бектұров «28th World investment conference» форумының министрлік кездесуінде сөйлеген сөзінде инновациялық өнім өндірудегі, экономикалық әртараптандырудағы және жобаларға инвестициялар тарту бойынша мүдделі тараптар арасындағы ынтымақтастықты жандандырудың стратегиялық маңыздылығын атап өтті. Ол Қазақстанның инвестициялық әлеуеті және осы саладағы жаңа мүмкіндіктер, сондай-ақ ел экономикасына шетелдік капиталды ынталандыру және тарту бойынша қабылданып жатқан Үкімет шаралары туралы баяндап берді.

«Цифрлық трансформацияны пайдалану және тұрақты өсім: инвестициялық мүмкіндіктерді кеңейту» тақырыбына арналған министрлік кездесуге әлемнің 100-ден астам елінен Министрлер, инвестициялық агенттіктердің, ірі қорлар мен қаржы институттарының өкілдері, кәсіпорындар мен халықаралық ұйымдардың басшылары қатысты.

Форум аясында ҚР Сыртқы істер министрінің орынбасары А.Қуантыровтың Сауд Арабиясының Инвестициялар министрінің бірінші орынбасары – Инвестициялық агенттігінің (SIPA) Бас директоры Ибрахим әл Мүбаракпен, «Lalei Albarkah» компаниясының Бас директоры Салех Батерджимен, «IDR» компаниясының басшысы Раббия Аққоучпен, KAFD аппаратының басшысы Мохсен Әл Фахадимен жеке кездесулері өтті, онда инвестициялық ынтымақтастықты одан әрі дамыту перспективалары, сауда-экономикалық байланыстарды жандандыру, Қазақстанда бірлескен инфрақұрылымдық жобаларды іске асыру мәселелері талқыланды.

Қазақстандық делегация сондай-ақ «ACWA Power» штаб-пәтеріне барып, компанияның директорлар Кеңесінің Төрағасы Мұхаммед Абунайянмен кездесті. Кездесу барысында тараптар Қазақ-Сауд ынтымақтастығын одан әрі кеңейту жолдарын, оның ішінде жаңартылатын энергия саласындағы бірлескен жобаларды іске асыру мүмкіндіктерін қарастырды.