Қазақстан мен Сауд Арабиясы екі ел арасындағы тікелей әуе рейстерінің санын ұлғайтуды жоспарлауда

Рияд, 2026 жылғы 15 ақпан – Қазақстан Республикасының Сауд Арабиясы Корольдігіндегі Елшісі Мадияр Меңілбеков Корольдіктің Азаматтық авиация бас басқармасының президенті Әбделазиз Әл-Дуайлежбен кездесу өткізді.

Кездесу барысында тараптар азаматтық авиация саласындағы екіжақты ынтымақтастықты нығайту перспективаларын талқылады. Атап айтқанда, әуе рейстерінің жиілігін арттыру, қосымша тікелей рейстерді іске қосу, сондай-ақ Қазақстан мен Сауд Арабиясының авиациялық мекемелері арасындағы өзара іс-қимылды күшейту мәселелеріне ерекше назар аударылды.

Тараптар әуе тасымалдаушылары мен жолаушылар үшін қолайлы жағдайлар жасаудың маңыздылығын атап өтіп, қазақ-сауд әріптестігін одан әрі нығайтуға өзара мүдделілік білдірді.

Келіссөздердің қорытындысы бойынша екі мемлекеттің авиациялық ведомстволары арасында екіжақты диалогты жандандыру туралы уағдаластыққа қол жеткізілді.