Ресей Федерациясы Үкіметінің Төрағасы Омбыдағы ҚазҰУ филиалының қызметімен танысты

Ресей Федерациясының Үкімет Төрағасы Михаил Мишустин Омбы қаласында орналасқан Қазақстанның жетекші жоғары оқу орындарының бірі – әл-Фараби атындағы Қазақ ұлттық университетінің филиалына барды. ҚазҰУ – Ресей аумағында өз филиалын ашқан алғашқы қазақстандық университет болды.

Іс-шараға Ресей Федерациясының ғылым және жоғары білім министрі Валерий Фальков, Омбы облысының губернаторы Виталий Хоценко, Омбы облысының жоғары білім және ғылыми-технологиялық даму жөніндегі министрі Александр Кольцов, Ф.М.Достоевский атындағы Омбы мемлекеттік университетінің ректор міндетін атқарушы Иван Кротт қатысты.

Қазақстан тарапынан Қазақстан Республикасының ғылым және жоғары білім министрі Саясат Нұрбек және әл-Фараби атындағы ҚазҰУ ректоры – басқарма төрағасы Жансейіт Түймебаев қатысты. Құрметті қонақтарды осы лауазымды тұлғалар қарсы алды.

Қонақтар қабылдау комиссиясының жұмысымен танысып, оқу корпусы мен ғылыми кітапхананы аралады. Кітапханада ҚазҰУ-дың ғылыми басылымдары ұсынылды.

Қазіргі уақытта қабылдау науқаны аясында филиал бакалавриаттың үш бағыты бойынша студенттер қабылдауда: филология факультеті – қазақ тілі мен әдебиеті, заң факультеті – кеден ісі, халықаралық қатынастар факультеті – халықаралық құқық. 200-ден 250-ге дейін талапкер қабылдау жоспарланып отыр.