Қазақстан мен Кения киберспорт және фиджитал-қозғалыс саласындағы ынтымақтастықты нығайтуда

Найроби, 2026 жылғы 2 сәуір – Қазақстан Республикасының Кения Республикасындағы Елшісі, ҚР-дың Найробидегі БҰҰ бөлімшесі жанындағы Тұрақты өкілі Барлыбай Садықов инновациялық спорт түрлерін дамыту саласындағы серіктестікті талқылау үшін Кенияның Электрондық спорт федерациясының (Esports Kenya Federation) басшылығымен кездесті.

Кездесуге Кенияның Киберспорт федерациясының Президенті, Жаһандық Киберспорт федерациясы Басқармасының мүшесі, Африканың киберспортты дамыту федерациясының вице-президенті Ронни Лусиджи, «82 Sports» компаниясының атқарушы директоры Джоаш Окуто және атқарушы директордың көмекшісі Уильям Нджиру қатысты.

Тараптар 2026 жылғы 29 шілде мен 9 тамыз аралығында Қазақстан астанасында өтетін «Болашақ ойындары» ауқымды халықаралық турниріне Кения делегациясының қатысуын талқылады.

Жоғары технологиялық жарыстарды ұйымдастыруда тәжірибе алмасу мақсатында Esports Kenya мен Қазақстанның киберспорт федерациясы (Qazaq Cybersport Federation) арасында тығыз байланыс орнату мәселесі қаралды. Кения тарапы Қазақстанмен ынтымақтастықты дамытуға және Шығыс Африкада киберспортты өркендету үшін осындай жарыстарды ұйымдастыру тәжірибесін пайдалануға қызығушылық білдірді.

Қатысушылар бұл серіктестік екі елде де инновацияларды дамыту үшін жаңа мүмкіндіктер туғызатынын атап өтті.

Тараптар ынтымақтастықты одан әрі дамытудың алдағы қадамдары мен кениялық спортшылардың Астанаға сапарына дайындық мәселелері бойынша уағдаласты.