Мюнхен қаласында ҚР Премьер-Министрінің бірінші орынбасары Роман Скляр Бавария басшылығымен келіссөздер жүргізді

2025 жылғы 4 сәуірде Қазақстан Республикасы Премьер-Министрінің бірінші орынбасары Р.Скляр бастаған қазақстандық делегация Германияға ресми сапары аясында Бавария федералдық жерінің астанасы – Мюнхен қаласына келді. Сапар барысында Бавария Премьер-Министрінің орынбасары, экономика, өңірлік даму және энергетика министрі Х.Айвангермен, сондай-ақ халықаралық ынтымақтастық және Еуропа мәселелері жөніндегі министр Э.Байсвенгермен келіссөздер өтті. Тараптар экономика, гуманитарлық байланыстар және халықаралық әріптестік салаларындағы екіжақты ынтымақтастық мәселелерін талқылады.

Келіссөздер барысында Қазақстан мен Бавария арасындағы сауда-экономикалық қатынастарды дамытуға ерекше назар аударылды. Тараптар екі экономиканың өзара толықтырылатынын атап өтіп, қарым-қатынасты кеңейтуге қызығушылық білдірді. Осы бағыттағы маңызды қадамдардың бірі 2025 жылғы мамыр айында Шымкент – Мюнхен бағытындағы тікелей әуе рейсінің іске қосылуы болмақ. Сонымен қатар, Р.Скляр мен Х.Айвангер «Қазақстан-Бавария іскерлік диалогы» атты бизнес-форумға қатысып, өнеркәсіп, ауыл шаруашылығы және логистика салаларындағы әріптестік мүмкіндіктерін талқылады. Шараға шамамен 70 бавариялық компанияның өкілдері қатысты.

Бавария Германиядағы Қазақстанның негізгі экономикалық серіктесі болып қала береді: 2024 жылы тараптар арасындағы тауар айналымы 4,7 млрд. еуроны құрады, бұл Қазақстан мен Германия арасындағы жалпы сауда көлемінің жартысына жуығын құрайды. Қазақстандық мұнай Баварияның мұнай импортының жартысын қамтамасыз етеді. Импорт көлемі бойынша Қазақстан Баварияда 15-орында тұр, бұл Түркия, Жапония және Оңтүстік Корея сияқты елдерді оза отырып.