Гомель облысында Қазақстан Республикасының құрметті консулдығы ашылды

Гомель, 2025 жылғы 23 желтоқсан - Қазақстан-Беларусь өңіраралық ынтымақтастығын нығайту жөніндегі дәйекті жұмыс шеңберінде Қазақстан Республикасының Беларусь Республикасындағы Елшісі Тимур Жақсылықов Гомельге іссапармен барды.

Сапардың басты оқиғасы Қазақстан Республикасының Гомель облысындағы Құрметті консулдығының салтанатты ашылуы болды.

Құрметті консулдықты аша отырып, Елші бұл оқиға екіжақты байланыстарды келесі деңгейге көтеруге бағытталған маңызды практикалық қадам екенін атап өтті. Оның осы аймақтағы қызметі іскерлік, мәдени және гуманитарлық байланыстарды жан-жақты қолдауға, азаматтардың құқықтарын қорғауға, сондай-ақ сауда мен инвестицияларға жәрдемдесуге бағытталатын болатынын жеткізді.

Жұмыс бағдарламасы барысында Елші Гомель қалалық атқару комитетінің төрағасы Владимир Приваловпен кездесті. Онда тараптар ынтымақтастықтың өзекті жай-күйі мен кең перспективаларын талқылады.

«Екінші ірі облыс орталығы ретінде біз машина жасау, химия өнеркәсібі, ет-сүт өнімдерін өндіру сияқты салаларда экспорт пен импортты ұлғайту үшін айтарлықтай өнеркәсіптік әлеуетке ие болып отырмыз», - деп айтты В.Привалов. «Біз, сондай-ақ, денсаулық сақтау, білім беру және мәдениет мекемелері елдеріміз арасындағы қосымша көпір бола алатын әлеуметтік саладағы серіктестікке ашықпыз», - деп жалғастырды.

Сондай-ақ, Гомель қаласының басшысы жақын арада Гомельдің қазақстандық Қарағанды және Павлодар қалаларымен бауырластық туралы келісімдер жасасу жоспарлары туралы хабарлады.

Жалпы, Гомель облысының кәсіпорындары мен Қазақстан өңірлері арасындағы тікелей байланыстарды жандандыруға, өнеркәсіптік кооперацияны тереңдетуге, сондай-ақ бірлескен жобаларды іске асыруға өзара мүдделілік атап өтілді.

Сондай-ақ, қазақстандық делегация «Спартак» кондитерлік фабрикасында болып, Гомельщинаның тамақ өнеркәсібі көшбасшыларының бірінің өндірістік қуаттарымен және шығарылатын өнімдерімен танысты.