Қазақстанның дінаралық және өркениетаралық үнқатысуға қосқан үлесі жаһандық абыройын күшейтуде

2025 жылғы 8 шілдеде Қазақстан Республикасының Португалия Республикасындағы Елшісі Жан Ғалиев Лиссабонда орналасқан Король Абдалла бен Абдель Азиз атындағы Дінаралық және мәдениетаралық диалог жөніндегі халықаралық орталықтың (KAICIID) Бас хатшысының міндетін атқарушы Антониу де Алмейда-Рибейрумен және орталық сарапшыларымен кездесті.

Кездесу барысында қазақстандық дипломат Астананың әлемдік діндер мен мәдениет өкілдері арасындағы өзара құрмет, төзімділік пен сенімді нығайтуға бағытталған халықаралық бастамалары туралы кеңінен әңгімелеп берді. Осы орайда, 2003 жылдан бері Қазақстанда өткізіліп келе жатқан Әлемдік және дәстүрлі діндер лидерлері Съезінің айрықша рөлі атап өтілді. Елші биыл Астанада Съездің сегізінші отырысы өтетінін хабарлады.

Өз кезегінде KAICIID ұйымының басшысы Қазақстан басшылығының конфессияаралық және этносаралық келісім мен диалогты дамыту бағытындағы күш-жігерін жоғары бағалап, беделді халықаралық алаңдар мен ұйымдар қызметінің өзара үйлесімділігін қамтамасыз ету маңызды екенін атап өтті. Антониу де Алмейда-Рибейру KAICIID діни конфессия өкілдері басқаратын және БҰҰ жанындағы Өркениеттер альянсымен тығыз ынтымақтастық орнатқан бірден-бір халықаралық институт екенін атап өтті.

Ол Қазақстанның халықаралық аренадағы абырой-беделі үнемі артып келе жатқанын атап өтіп, өзара тиімді әріптестікке сенім білдірді. Сонымен қатар, Әлемдік және дәстүрлі діндер лидерлері Съезі Хатшылығының мол тәжірибесін ескере отырып, онымен әріптестік орнатуға дайын екенін растады.

Фотоны KAICIID ұсынды.