Индонезия Парламентінде тұңғыш рет Қазақстан туралы фотокөрме ұсынылды.
Джакарта, 2025 жылғы 4 қараша - Парламентаралық ынтымақтастықты нығайту мақсатында екіжақты қарым-қатынастар тарихында тұңғыш рет Индонезияның өкілдер Палатасының ғимаратында Қазақстан Республикасының Джакартадағы Елшілігі ұйымдастырған «Әртүрліліктегі үйлесімділік: Қазақстан мен Индонезия» фотокөрмесінің салтанатты ашылуы өтті. Іс-шараға түрлі комитеттердің индонезиялық парламентшілері, Қазақстан Парламентімен достық тобының депутаттары, сондай-ақ Индонезия заң шығарушы органының аппарат қызметкерлері қатысты.
Көрмеде Қазақстанның әдемі табиғи ландшафттары мен қалаларының футуристік көріністері және мемлекетаралық байланыстардың даму тарихының естелік фотосуреттері көрсетілді.
Индонезия Өкілдер палатасының парламентаралық ынтымақтастық комитетінің төрағасы Мардани Али Сера өзінің құттықтау сөзінде қоғамдық дипломатияны, өзара түсіністік пен мәдени алмасуды нығайту үшін фотокөрме өткізудің маңыздылығын атап өтті.
Қазақстан-Индонезия парламенттік достық тобының төрағасы Ваян Судирта өз сөзінде құрметті орта держава және Орталық Азияның экономикалық көшбасшы Қазақстанмен жоғары деңгейдегі және белсенді диалогты атап өтті.
Өз кезегінде, Қазақстан Елшісі Сержан Әбдікәрімов қатысып отырған заң шығарушыларды Индонезия Тәуелсіздігінің 80 жылдығымен құттықтап, ҚР Елшілігінің осы фотокөрмені өткізу бастамасын қолдағаны және ҚР-мен тығыз ынтымақтастығы үшін Парламент басшылығына алғысын білдірді. Дипломат Қазақстан-Индонезия әріптестігінің ілгерілеуі мен болашағын және Президент Қасым-Жомарт Тоқаевтың қыркүйектегі «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауында қойған міндеттер аясындағы Қазақстанның қазіргі дамуы туралы айтып берді. Осыған байланысты дипломат өзара мүдделі салаларда Қазақстан мен Индонезия арасындағы көпқырлы ынтымақтастықты кеңейту үшін айтарлықтай әлеуетті, жаңа бағыттарды және қолайлы мүмкіндіктерді атап өтті. Мемлекет басшысының Қазақстандағы бір палаталы Парламентке жалпыхалықтық талқылау және 2027 жылы осы маңызды мәселе бойынша жалпыұлттық референдум өткізу арқылы көшу туралы ұсынысы ерекше атап өтілді.
Фотокөрме барысында Абай Құнанбайұлының «Қара сөздер» кітабының Индонезия тіліндегі екінші басылымы қазақтың ұлы ақыны және ағартушысының туғанына 180 жыл толуына орай таныстырылды. Дипломат бұл кітап Индонезиялық серіктестерге қазақ халқының жаны мен менталитетін жақсы түсінуге, екі достас ел халықтары арасындағы мәдени және адами байланыстарды нығайтуға мүмкіндік беретініне сенім білдірді.
Индонезия парламентшілері сондай-ақ дәстүрлі қазақ тағамдарының дәмін татып, Қазақстанның бай туристік әлеуеті туралы бейнероликтерді көруге мүмкіндік алды.