Ыстанбұлда түркі мемлекеттерінің жоғары аудит органдары TÜRKSAI ұйымын құру туралы декларацияға қол қойды

       Ыстанбұл, 2025 жылғы 22 қараша-Ыстанбұл қаласында Түркі мемлекеттері ұйымына (ТМҰ) мүше елдердің жоғары аудит органдары өкілдерінің ресми кездесуі өтті. Іс-шараға Қазақстан тарапынан Қазақстан Республикасы Жоғары аудиторлық палатасының төрағасы Әлихан Смайылов бастаған делегация қатысты.

       Кездесу барысында түркі мемлекеттері жоғары аудит органдарының жаңа кәсіби бірлестігі – TÜRKSAI (Түркі мемлекеттерінің жоғары аудит органдары ұйымы) құрылатындығы туралы декларацияға қол қойылды. Құжатқа Әзербайжан, Қазақстан, Қырғызстан, Түркия және Өзбекстанның жоғары аудит органдарының басшылары қол қойды.

       Жаңа ұйымның басты мақсаты – түркі кеңістігінде аудит саласындағы кәсіби ынтымақтастықты тереңдету, жоғары аудит органдары арасындағы үйлесімділікті арттыру, тәжірибе және білім алмасу механизмдерін күшейту.

       TÜRKSAI жұмысы келесі бағыттарды қамтитын болады:

• аудит процестерінде жасанды интеллектіні қолдану;
• үлкен деректер аналитикасын пайдалану;
• тиімділік, қаржылық, экологиялық және IT-аудит әдістерін жетілдіру;
• бірлескен және параллель аудиттер жүргізу;
• практикалық тренингтер мен зерттеу жобаларын іске асыру;
• халықаралық алаңдарда өзара қолдау көрсету.

       Өз сөзінде Әлихан Смайылов TÜRKSAI-дың ұзақ мерзімді дамуы жөніндегі Қазақстанның көзқарасын таныстырып, ұйымның құрылуы түркі мемлекеттерінің институционалдық тұрақтылықты, мемлекеттік басқарудағы ашықтық пен есептілікті күшейтуге деген ортақ ниетін көрсететінін атап өтті.

       «Бұл тарихи оқиға – жоғары аудит органдары арасындағы ынтымақтастықты жаңа деңгейге көтеретін маңызды қадам. ТҮРКСАИ достықтың, сенімнің және кәсіби өзара іс-қимылдың берік көпіріне айналады деп сенеміз», – деді ол.

       Жиын қорытындысы бойынша алдағы үш жылда ұйымға Түркияның Есеп соты төрағалық етеді. Кейінгі кезеңдерде төрағалық ТМҰ елдерінің әліпби реті бойынша ротациялық негізде белгіленетін болады.