Ыстанбұлдың саяси, іскер және қоғамдық топтары Қазақстанды Мемлекеттік егемендік декларациясының қабылданғанына 35 жыл толуымен құттықтады

       Ыстанбұл, 2025 жылғы 23 қазан - Түркияның жетекші саяси, іскер және қоғамдық топтары Қазақстанды Мемлекеттік егемендік туралы декларацияның қабылданғанына 35 жыл толуымен шын жүректен құттықтады. Бұл тарихи құжат тәуелсіз және заманауи Қазақстан мемлекетінің іргетасын қалаған болатын. Ыстық ықылас пен достыққа толы ерекше лебіздер Ыстанбұл губернаторының атынан да жеткізіліп, Қазақстан мен Түркия халықтарын біріктіретін стратегиялық серіктестік пен бауырластық байланыстар атап өтілді.

       Түркияның жетекші холдингтері мен инвестициялық компанияларының басшыларын қамтыған іскер топ өкілдері Қазақстанның тұрақты дамуын және оның экономикалық трансформациясының жоғары қарқынын ерекше атап өтті. Олар өз құттықтауларында бүгінгі таңда Қазақстанның Еуразияның басты экономикалық және көлік орталығының біріне айналғанын, сондай-ақ елдің реформалары мен ашық инвестициялық саясаты екіжақты ынтымақтастық үшін бірегей мүмкіндіктер ашып отырғанын атап өтті.

       Түркияның қоғамдық және мәдени қайраткерлері екі ел арасындағы ортақ түркі тамырларынан бастау алатын рухани және тарихи жақындықты еске алды. Құттықтау хаттарында гуманитарлық байланыстарды, білім беру бағдарламаларын және мәдени алмасуларды нығайтуға қосқан үлес үшін ризашылық білдіріліп, бұл бағыттағы жұмыстар түркі әлемінің өзара түсіністігі мен бірлігін күшейтіп отырғаны атап өтілді.

       Қазақстан Республикасының Ыстанбұл қаласындағы Бас консулдығы түрік достарына көрсеткен ықыласы, жылы лебіздері мен қолдауы үшін шын жүректен алғыс білдірді. Бұл дата Қазақстан мен Түркия арасындағы мызғымас достық пен өзара құрметтің тағы бір нышанына айналып, екі ел арасындағы стратегиялық әріптестік пен бауырластық қатынастардың одан әрі нығая түсуіне сенім ұялатты.