Қазақстан мен Финляндия цифрлық технологиялар саласындағы әріптестікті нығайтуда

Хельсинки, 2025 жылғы 13 мамыр – Қазақстан Республикасының Елшісі Азамат Әбдіраимов финдік «Nokia» компаниясының Эспоодағы бас кеңсесінде болып, мемлекеттік органдармен байланыс жөніндегі басшы Карол Маттиламен кездесті.

Сапар барысында қазақстандық дипломат «Nokia» жаһандық қызметімен және оның сыртқы нарықтардағы негізгі бағыттарымен танысты. Цифрландыру, телекоммуникация және инновациялық шешімдерді енгізу саласындағы екіжақты ынтымақтастықтың перспективалары талқыланды.

Тараптар Қазақстанда телекоммуникациялық инфрақұрылымды дамытуда және цифрлық экожүйелерді құруда «Nokia» технологиялық әзірлемелерін қолдану мүмкіндіктеріне ерекше назар аударды.

Соңында тараптар ынтымақтастықты дамыту және кеңейту үшін өзара іс қимылды жалғастыруға уағдаласты.