Душанбеде қазақтың ұлы ақыны, ойшылы және ағартушысы Абай Құнанбайұлының рухына тағзым етілді

Душанбе, 2026 жылғы 10 тамыз – Душанбе қаласында ұлы қазақ ақыны, ойшылы әрі ағартушысы Абай Құнанбайұлының туғанына 181 жыл толуына орай оның бюстіне гүл қою рәсімі өтті.

Еске алу шарасына Қазақстан Республикасының Тәжікстан Республикасындағы Төтенше және Өкілетті Елшісі Уәлихан Төреханов, Қазақстан Республикасының Елшілігі қызметкерлері, Тәжікстанда жұмыс істейтін және тұратын Қазақстан азаматтары, Тәжікстанның жоғары оқу орындарында білім алып жатқан қазақстандық студенттер, сондай-ақ қазақ диаспорасының өкілдері қатысты.

Іс-шараға қатысушылар Душанбе қаласындағы А.Фирдавси атындағы саябақта орналасқан А.Құнанбайұлының бюстіне гүл шоқтарын қойып, қазақ халқының ұлы перзентінің рухына тағзым етті.

Іс-шара барысында Елші У.Төреханов Абай мұрасының қазақ халқының рухани және адамгершілік құндылықтарын қалыптастырудағы айрықша рөліне тоқталды. «Абай – қазақ әдебиетінің тарихындағы ұлы есім ғана емес. Ол сөзі әрбір ұрпақ үшін өзектілігін жоғалтпайтын рухани бағдар. Оның білім мен ғылымға, ағартушылыққа, адал еңбекке және адамгершілік жауапкершілікке үндеген ойлары бүгінгі күні де ерекше маңызға ие», – деп атап өтті Елші.

Шара барысында Абайдың әдеби және музыкалық мұрасына ерекше назар аударылды. Музыканттардың орындауында ұлы ақынның қазақ мәдениетінің ажырамас бөлігіне айналған танымал шығармалары – «Көзімнің қарасы» және «Желсіз түнде жарық ай» шырқалды.

Іс-шараның маңызды әрі тағылымды бөлігі Елшілік қызметкерлерінің балаларының қатысуымен жалғасты. Олар Абайдың өлеңдері мен «Қара сөздерінен» үзінділер оқып, ұлы ойшылдың тағылымды ойларын көпшілік назарына ұсынды. Балалардың өнер көрсетуі ерекше символдық мәнге ие болып, Абайдың рухани мұрасының ұрпақтан-ұрпаққа жалғасып келе жатқанын және жас ұрпақ үшін маңызын айқын көрсетті.

2024 жылғы 21 тамызда Тәжікстандағы Қазақстанның мәдениет күндері аясында және Қазақстан Республикасының Президенті Қасым-Жомарт Кемелұлы Тоқаевтың Тәжікстан Республикасына мемлекеттік сапары қарсаңында ұлы Абайдың бюсті салтанатты түрде ашылды.