Жыл қорытындысы және Қазақстан мен Тәжікстан арасындағы ынтымақтастықтың басымдықтары

Душанбе, 2025 жылғы 17 желтоқсан – Қазақстан Республикасының Тәжікстан Республикасындағы Төтенше және Өкілетті Елшісі Уәлихан Төреханов бұқаралық ақпарат құралдарының өкілдері мен сарапшылар қауымдастығына арналған брифинг өткізіп, оның барысында Қазақстан мен Тәжікстан арасындағы екіжақты қарым-қатынастардың қазіргі жағдайы мен даму перспективалары жан-жақты баяндалды. Брифинг барысында қатысушыларға ҚР Президенті Қ.К.Тоқаевтың басшылығымен Қазақстандағы саяси және экономикалық реформалар туралы ақпараттық бюллетень ұсынылды.

Өз сөзінде дипломатиялық миссияның басшысы қазақ-тәжік қарым-қатынастарының тұрақты, сенімді және жүйелі сипатқа ие екенін, олардың көпжылдық достық, өзара құрмет және стратегиялық әріптестік дәстүрлеріне негізделгенін атап өтті. Жоғары және аса жоғары деңгейлердегі белсенді саяси диалог барлық негізгі бағыттар бойынша ынтымақтастыққа оң серпін беріп отырғаны ерекше айтылды.

Елші сауда-экономикалық байланыстардың дамуы туралы ақпарат беріп, өзара тауар айналымының тұрақты өсіп келе жатқанын, жеткізілетін өнім түрлерінің кеңейіп отырғанын және өнеркәсіп, агроөнеркәсіп кешені, энергетика, көлік және логистика салаларында кооперацияны тереңдету үшін елеулі әлеует бар екенін атап өтті. Қазақстан бірлескен инвестициялық жобаларды іске асыруға және екі елдің іскер топтары арасындағы байланыстарды нығайтуға әрі қарай да жәрдемдесуге дайын екенін растады.

Брифинг барысында гуманитарлық ынтымақтастыққа ерекше көңіл бөлінді. У.Төреханов білім беру, ғылым, мәдениет және спорт салаларындағы белсенді өзара іс-қимылды атап өтті. Қазақстан тәжік жастарына қазақстандық жоғары оқу орындарында білім алуға арналған гранттар беру арқылы білім беру бағдарламалары аясында қолдау көрсетуді жалғастырып, сондай-ақ мәдени және академиялық алмасуларды кеңейтуге ықпал етуде.

Елші сондай-ақ Қазақстан мен Тәжікстанның БҰҰ, ТМД, ШЫҰ және басқа да көпжақты форматтар шеңберіндегі өзара іс-қимылының маңыздылығын атап өтті. Тараптар аймақтық және халықаралық күн тәртібіндегі өзекті мәселелер, соның ішінде қауіпсіздікті қамтамасыз ету, орнықты даму және Орталық Азияның су-энергетикалық проблематикасы бойынша бір-бірін дәйекті түрде қолдап келеді.

Брифинг соңында У.Төреханов қазақ-тәжік қарым-қатынастарының алдағы уақытта да халықтардың мүдделеріне сай және өңірдегі тұрақтылық пен ынтымақтастықты нығайтуға үлес қоса отырып, қарқынды дами беретініне сенім білдірді.

Брифинг конструктивті жағдайда өтіп, бұқаралық ақпарат құралдары мен сарапшылар қауымдастығы тарапынан қызығушылық тудырды.