Қазақстан мен Мысыр Африка бойынша мамандар даярлау саласында ынтымақтастықты нығайтуда

Каир, 2025 жылғы 3 қараша – Қазақстан Республикасының Мысыр Араб Республикасындағы Елшісі Асқар Жеңіс Каир университетінің Ректоры Мұхаммед Әбделсадеқпен кездесіп, жоғары білім саласындағы ынтымақтастық және университеттер арасындағы байланыстарды жандандыру мәселелерін талқылады.

Кездесу барысында екі елдің білім саласындағы ынтымақтастығының қазіргі жағдайы және оны одан әрі дамыту перспективалары жөнінде пікір алмасты. Сондай-ақ елдеріміз арасындағы білім беру ынтымақтастығы аясында Каир университетінде Шығыстану және араб тілі мамандығы бойынша студенттерді даярлау және еліміздің дипломатиялық өкілдіктер географиясының кеңеюі мен Африка құрлығындағы Елшіліктеріміздің санының артуын ескере отырып, Африка танушы мамандығы бойынша кадрлар даярлау және құрлықтағы кең тараған африкалық тілдерді меңгеру мәселелері көтерілді.

Сонымен қатар, тараптар Каир университетінің түрлі салаларда кәсіби мамандарды дайындау тәжірибесінің тарихы тереңде екендігін алға тарта отырып, заман талаптарына сай медицина, жаңа технологиялар, жасанды интеллект және цифрландыру бағыттарда мамандарды дайындауда қарым-қатынастарымызды қолға алудың қажеттігіне мән берді.

1908 жылы ашылған Мысырда және бүкіл араб әлеміндегі ең көне Каир университетінде 200 мыңнан астам студенті және 26 факультеті бар тарихи маңызды мемлекеттік оқу орны болып саналады. Аталған оқу орнын көптеген көрнекті саясаткерлер және қоғам қайраткерлері тәмамдаған. Атап айтқанда, Амр Муса Араб мемлекеттері лигасының Бас хатшысы және Мысырдың Сыртқы істер министрі, Бутрос Бутрос-Гали БҰҰ-ның Бас хатшысы, Хосни Мүбарак Мысырдың Президенті, Нагиб Махфуз әдебиет бойынша Нобель сыйлығының лауреаты, Гананың алғашқы Президенті және Премьер-Министрі Кваме Нкрума, Ясир Арафат, Саддам Хусейн сияқты және т.б. тұлғалар оқыды. Сондай-ақ, Сауд Арабиясының Королі Салман бен Әбделазиз Әл Сауд сияқты және т.б. қазіргі уақыттағы басшыларға университеттің Құрметті докторы атағы берілген.