Мажарстанда қазақтың ұлы ақыны және ойшылы Абай Құнанбайұлының 180 жылдығы аталып өтті

Будапешт, 2025 жылғы 10 тамыз - Бүгін Мажарстандағы Қазақстан Республикасының Елшілігі ұлы қазақ ақыны және ойшылы Абай Құнанбайұлының туғанына 180 жыл толуына орай Будапешт қаласында ескерткішіне гүл шоғын қою рәсімін ұйымдастырды.

Іс-шара Будапешт қаласының орталық саябағында, Астана көшесінде орналасқан Абай бюсті жанында өтті. Бұл орынға жыл сайын қазақстандықтар ақынның рухына тағзым етуге келеді.

Өз сөзінде Қазақстан Республикасының Мажарстандағы Елшісі Абзал Сапарбекұлы жиналғандарды осы маңызды мерекемен құттықтап, Абайдың мұрасы қазақ халқының рухани байлығының, адамгершілік құндылықтарының және шабыттың мәңгілік қайнары екенін, сондай-ақ Қазақстан мен Мажарстан арасындағы мәдени өзара түсіністі нығайтатын алтын көпір болып табылатынын атап өтті. Дипломат Мемлекет басшысының шешімімен 10 тамыз – Абай күні болып жарияланғанын, ал ойшыл Абайға арналған мәдени шаралардың тек Қазақстанда ғана емес, шет елдерде де кеңінен аталып өтіп жатқанын атап өтті.

Мерекелік бағдарламада мажарстандық өнерпаздар мен қазақ әдебиетінің жанашырлары өнер көрсетті. Әдебиет сүйер қонағымыз Аттила Ваш мырза Абайдың бір шумақ өлеңін мажар тілінде оқыды: «Embereknek ne higyj, bárhogy dicsérnek» («Адамдарға сенбе, қанша мақтаса да»). Ал Мажарстанның талантты әншісі Тимея Янурик ұлттық аспаптың сүйемелдеуімен композитор Сәкен Тұрысбектің Абай сөзіне жазылған «Мен бір жұмбақ адаммын» әнін үлкен шабытпен орындады.

Іс-шара соңында Елші Абзал Сапарбекұлы Қазақстан Республикасының Президенті Қасым-Жомарт Тоқаевтың атынан Тимея Янурик ханымға екі ел арасындағы мәдени ынтымақтастықты дамытуға қосқан зор үлесі үшін «Шапағат» мемлекеттік наградасын табыстады.

Анықтама: 2020 жылы Абайдың туған күні Қазақстанда ресми түрде мерекелік дата болып жарияланды. Бұл күн ұлы ойшылдың қазақ мәдениеті үшін маңызын және оның елдегі әдебиет пен ағартушылықтың дамуына әсерін айқындайды.