Шетел азаматтарына арналған «QazETA» цифрлық платформасы

QazETA – шетел азаматтарына арналған цифрлық мемлекеттік платформа

QazETA – шетел азаматтарына көші-қон және оған ілеспе негізгі қызметтерге «бір терезе» қағидаты бойынша (шетелдіктерге арналған бірыңғай цифрлық терезе) ыңғайлы, ашық әрі қауіпсіз қолжетімділікті қамтамасыз ету мақсатында құрылған мемлекеттік цифрлық платформа.

Жоба шетел азаматтарының Қазақстанның мемлекеттік органдарымен өзара іс-қимылының заманауи әрі қолайлы үлгісін қалыптастыруға, сондай-ақ көрсетілетін қызметтердің тиімділігі мен сапасын арттыруға бағытталған.

Нұсқаулықты жүктеп алу: QazETA Guide

QazETA платформасының негізгі мақсаттары:

шетел азаматтарының Қазақстан Республикасына кіруі мен елде болуына байланысты рәсімдерді жеңілдету;
шетелдіктің елге кіру сәтінен бастап күнделікті қызметтерді пайдалануына дейін мемлекеттік сервистермен жүйелі өзара іс-қимылын қамтамасыз ететін бірыңғай цифрлық кіру нүктесін құру;
процестердің ашықтығын арттыру, өтінімдерді қарау мерзімдерін қысқарту және қызмет көрсету сапасын жақсарту;
негізгі көші-қон рәсімдерін цифрлық және мобильді форматқа көшіру.

Қазіргі уақытта QazETA пилоттық режимде жұмыс істейді және оны енгізу кезең-кезеңімен жүзеге асырылады. Осы кезеңде келесі қызметтер қолжетімді:

электрондық виза (e-Visa) алу;
электрондық кіру рұқсатын (ETA) рәсімдеу;
Қазақстан Республикасының электрондық резиденті мәртебесін (e-Residency) алу;
шетел азаматтарының Қазақстан Республикасының мемлекеттік шекарасынан өткендігі туралы анықтама алуы (соның ішінде мобильді құрылғылардың IMEI кодтарын верификациялау мақсатында).

Платформаның негізгі сервистері

Электрондық виза (e-Visa)

Электрондық виза – бұл шетел азаматтары мен азаматтығы жоқ адамдарға виза беру жөніндегі мемлекеттік қызметтің цифрлық нысаны.

104 мемлекеттің азаматтары (тізім қоса беріледі) келесі санаттар бойынша бір реттік электрондық виза рәсімдей алады:

«А3» (қызметтік);
«А5» (инвесторлық);
«В1», «В2», «В3» (іскерлік);
«В9-1» (Digital Nomad Visa);
«В10» (жеке);
«В12» (туристік);
«С12» (емделу мақсатында).

Электрондық виза электрондық форматта рәсімделген шақыру негізінде беріледі (шақыру ҚР ІІМ аумақтық полиция органдарында рәсімделеді) және тек визаны алушыға ғана жарамды, бірге жүретін тұлғаларға қолданылмайды.

Паспорт ауыстырылған жағдайда электрондық визаны қайта алу қажет.

Шетел азаматтары мен азаматтығы жоқ адамдар Қазақстан Республикасының аумағына тек жарамды электрондық визаны пайдалана отырып және Қазақстан Республикасының халықаралық әуежайларындағы өткізу пункттері арқылы ғана кіріп-шыға алады.

Электрондық кіру рұқсаты (Electronic Travel Authorization – ETA)

ETA Қазақстан Республикасының визалық талаптарынан босатылған мемлекеттердің азаматтарына арналған. Рұқсат электрондық форматта рәсімделеді.

Қазақстанға сапарлауды жоспарлаған шетел азаматтары ETA алуға өтінімді мобильді қосымша арқылы сапардан кемінде 72 сағат бұрын береді.

ETA-ның жарамдылық мерзімі – 180 күн.

Шетел азаматтарының Қазақстандағы нақты болу мерзімі қолданыстағы көші-қон заңнамасына сәйкес реттеледі.

Сонымен бірге берілген ETA Қазақстан Республикасының аумағына кіруге кепілдік бермейді. Елге кіруге рұқсат беру туралы түпкілікті шешімді шекаралық бақылаудан өту кезінде Қазақстан Республикасының уәкілетті мемлекеттік органы қабылдайды.

ETA алу талабынан мына тұлғалар босатылады:

дипломатиялық және қызметтік паспорттардың иелері;
ресми делегация мүшелері;
Қазақстан Республикасында аккредиттелген дипломатиялық корпус өкілдері.

Пилоттық кезеңде Қазақстан Республикасының визалық талаптарынан босатылған елдер азаматтары үшін ETA алу ұсынымдық сипатқа ие. Пилоттық кезең аяқталғаннан кейін аталған санаттағы азаматтар үшін ETA алуды міндетті түрде енгізу кезең-кезеңімен жоспарланып отыр.

Электрондық резиденттік (e-Residency)

e-Residency – Қазақстан Республикасынан тыс жерде жүрген шетел азаматтары мен азаматтығы жоқ адамдарға «Астана» халықаралық қаржы орталығының (АХҚО) юрисдикциясы шеңберінде мемлекеттік және коммерциялық цифрлық сервистерге қолжетімділік беретін инновациялық құрал.

Электрондық резиденттік АХҚО юрисдикциясы аясында жүзеге асырылады және мыналарды қамтиды:

жеке сәйкестендіру нөмірін (ЖСН) қашықтан алу;
банктік шоттар мен төлем карталарын ашу;
eSIM рәсімдеу;
компанияларды қашықтан тіркеу және бизнес жүргізу.

Қазақстан Республикасының мемлекеттік шекарасынан өткені туралы анықтама алу

Платформа арқылы шетел азаматтары Қазақстан Республикасының мемлекеттік шекарасынан өткені туралы анықтама ала алады, оның ішінде мобильді құрылғылардың IMEI кодтарын верификациялау мақсатында.