Қазақстан Елшісі Orange the World бастамасын қолдауға арналған жыл сайынғы кампанияға қатысты

Қазақстанның Словакиядағы Елшісі Жанна Сағынова биылғы жылы «UNiTE to End Digital Violence Against All Women and Girls» («Барлық әйелдер мен қыздарға қатысты цифрлық зорлық-зомбылықты тоқтату үшін бірігейік») ұранымен өтіп жатқан Orange the World / Әйелдерге қатысты зорлық-зомбылықты жою күніне орай 16 күндік науқанды қолдауға арналған жыл сайынғы кампанияға қатысты. Кампания әйелдер мен қыздарға қатысты зорлық-зомбылықтың алдын алуға және оны жоюға бағытталған.

Іс-шара Словак Республикасының Президенті Петер Пеллегрини, Үкімет мүшелері және дипломатиялық корпус өкілдерінің қатысуымен өтті. Қатысушылар қауіпсіздікті қамтамасыз ету, әйелдердің құқықтарын қорғау және гендерлік негіздегі зорлық-зомбылыққа нөлдік төзімділік қағидатын ілгерілету бойынша ұлттық және халықаралық шараларды одан әрі нығайтудың маңыздылығын атап өтті. Шараның символдық қызғылт сары түсі зорлық-зомбылық пен кемсітушіліктен азат қоғам құруға деген ұмтылысты білдіреді.

Анықтама: Orange the World кампаниясы жыл сайын 25 қараша мен 10 желтоқсан аралығында өткізіліп, әйелдер мен қыздарға қатысты зорлық-зомбылықтың барлық түрлеріне қарсы күресте мемлекеттердің, халықаралық ұйымдардың, азаматтық қоғам мен бұқаралық ақпарат құралдарының күш-жігерін біріктіреді.