Қазақстан мен Германия СІМ басшылары саяси және экономикалық тығыз әріптестікті нығайтудың жаңа тәсілдерін талқылады
АСТАНА, 2022 жылғы 31 қазан – Бүгін Германияның Сыртқы істер министрі Анналена Бербок Қазақстанға алғаш рет Бундестаг депутаттары, неміс бизнес және БАҚ өкілдерінен құралған делегациямен келді. Жұмыс бағдарламасы аясында ол ҚР Премьер-Министрі Әлихан Смайыловтың қабылдауында болды және ҚР Премьер-Министрінің орынбасары – Сыртқы істер министрі Мұхтар Тілеубердімен Астана мен Берлиннің саяси және экономикалық тығыз әріптестікті нығайтудың жаңа тәсілдері жөнінде келіссөздер жүргізді.
ҚР СІМ-де өткен кездесу кезінде тараптар Қазақстан-Германия қарым-қатынасының экономикалық ынтымақтастықтан бастап ү.ж. алғашқы сегіз айында 6,4 млрд АҚШ долларға жеткен тауар айналымын (былтырғы жылдың көрсеткіштеріне қарағанда 57 пайызға өскен) одан әрі арттыру перспективаларын талқылады. Сонымен қатар, Қазақстан өңірлерінде ЖЭК саласындағы неміс флагмандары Goldbeck Solar және Svevind компанияларымен бірлескен жобаларды жүзеге асыруды ескере отырып, энергетика саласындағы кооперацияның жаңа түрлері бойынша пікір алмасты.
Сыртқы саяси ведомстволардың басшылары өңірлік және халықаралық күн тәртібіндегі мәселелерді талқылады. Қазақстанның бейбітшілік пен келісім жолындағы халықаралық, этносаралық және дінаралық диалогты құрудағы рөлі ерекше аталды.
Астана мен Берлиннің көлік және логистика, ауыл шаруашылығы, энергетика және мәдени-гуманитарлық ынтымақтастық саласында сындарлы өзара іс-қимылға деген қызығушылықтарына айрықша назар аударылды. Қазақстанның Германия мен Еуропаға пайдалы қазба, тамақ өнеркәсібі өнімдері, шикі мұнай және басқа да энергия ресурстарын жеткізуде сенімді серіктес екеніне тоқтала келе, М.Тілеуберді қазақстандық тараптың герман серіктестеріне ерекше артықшылықтар беруді кең ауқымды инвестициялар мен неміс технологиялардың трансферіне алмастыруға дайын екенін атап айтты.
Бірлескен баспасөз конференциясында сөйлеген сөзінде А. Бербок Астанада Германияның Сутегі дипломатиясының кеңсесін ашуын жариялады. ГФР СІМ қолдауымен GIZ Герман халықаралық ынтымақтастық қоғамының аясында құру жоспарланып отырған екіжақты энергетикалық іс-қимылдың жаңа құрылымы екі елдің тұрақты отын-энергетика циклін құру мәселелері жөніндегі үкіметтік және сараптама топтары арасындағы практикалық іс-қимылды жүйелеуге арналған.
ГФР СІМ басшысымен бірге келген Герман экономикасы шығыс комитетінің және Сыртқы сауда палатасының басшылығы, сондай-ақ бизнес өкілдері, оның ішінде Lufthansa, Aurubis және Knauf сияқты ірі компаниялардың топ-менеджерлері ҚР Премьер-Министрінің Бірінші орынбасары Р.Склярмен кездесті. Кездесулер "Самұрық-Қазына" АҚ мен ҚР Индустрия және инфрақұрылымдық даму министрлігінде өтті.
Неміс саясаткермен бірге барған Бундестаг депутаттары - Анико Глоговски-Мертен, Андреас Ларем және Робин Вагенер - ҚР Парламенті Сенаты Төрағасының орынбасары О.Перепечинамен және ҚР Парламенті Мәжілісіндегі «Қазақстан-Германия» достық парламенттік топ мүшелерімен келіссөздер өткізді.
Неміс тарапы ҚР Президенті Қасым-Жомарт Тоқаевтың «Әділетті Қазақстанды» құру жөніндегі саясатымен, елде жүргізіліп жатқан ауқымды демократиялық реформалармен, сондай-ақ 20 қарашада өтетін алдағы президенттік сайлауды ашық және еркін түрде өткізуге бейілділігімен танысты. Неміс делегациясына инвестициялық ахуалды одан әрі жетілдіру және елімізбен «жасыл» энергетика, ауыл шаруашылығы және бәсекеге қабілетті көлік-логистикалық тізбектерді қалыптастыру салаларында өзара тиімді ынтымақтастық мүмкіндіктері жөнінде шаралар ұсынылды. Делегация құрамында ГФР-дың ресми және іскер топтарынан барлығы 50-ге жуық өкілі келді. Бұл аса ірі еуропалық экономиканың республикамызбен және жалпы алғанда Орталық Азия өңірімен ынтымақтастықтың толық әлеуетін ашуға деген айрықша қызығушылығын білдіреді.
Сапар барысында А.Бербоктың қатысуымен бірқатар кездесулер мен іс-шаралар өтті, атап айтқанда, ол ҚР-дағы Адам құқықтары жөніндегі өкілі Э.Азимовамен және Астанадағы ЕҚЫҰ Бағдарламалар офисінің басшысы Ф.Фробартпен сұхбаттасты.
«Алжир» мемориалды-мұражай кешеніне бару кезінде Германияның Министрі гүл шоғын қойды.
Сапардың тағы бір бөлігі «ЭКСПО-2017» көрмесі аумағында орналасқан «Нұр-Әлем» болашақ энергиясы мұражайына экскурсия және экология саласымен айналысатын әйелдермен пікірталасы болды.
Биыл Қазақстан мен Германия бүгінгі таңда стратегиялық ынтымақтастықтың барлық саласындағы үдемелі дамумен сипатталатын дипломатиялық қарым-қатынастың 30 жылдығын атап өтуде. Мәселен, соңғы он жылда Орталық Азия өңіріне денсаулық сақтауды, ауыл шаруашылығын және көлік логистикасын сапалы дамытуға бағытталған барлық тікелей неміс инвестициясының шамамен 80%-ы еліміздің үлесіне тиесілі. 2005 жылдан бастап неміс компаниялары Қазақстанға 5,2 млрд АҚШ долларын салды, ҚР-да ГФР компанияларының қатысуымен 600 кәсіпорын жұмыс істейді.