Берлинде Абай Құнанбайұлының рухына тағзым етілді

Берлин, 2026 жылғы 9 тамыз – Ұлы қазақ ақыны, ойшылы және ағартушысы Абай Құнанбайұлының туған күніне орай Германия астанасында Қазақстан диаспорасының балалары мен Қазақстанның Германиядағы Елшілігінің қызметкерлері ақынның Берлиндегі ескерткішіне гүл шоқтарын қойды.

Іс-шараға қатысушылар Абайды шығармашылығы мен философиялық көзқарастары Қазақстанның рухани мәдениетінің ажырамас бөлігі болып саналатын көрнекті ойшыл ретінде құрметпен еске алды. Сонымен қатар, оның білімге ұмтылу, өзара сыйластық пен әлемге ашықтыққа үндейтін идеялары бүгінгі күні де өзектілігін жоғалтпай, халықтар арасындағы мәдени үнқатысуды дамытуға ықпал ететіні атап өтілді.

Іс-шара аясында балаларға ерекше көңіл бөлініп, қазақ киіз үйінде Абайдың өмірі мен шығармашылығына арналған әдеби кеш ұйымдастырылды. Жас қонақтар ақынның шығармаларымен танысып, оның негізгі идеяларын талқылап, Қазақстан тарихы мен мәдениетіндегі орны туралы мол мағлұмат алды.

Бағдарлама Абайдың өмірбаяны мен шығармашылығына арналған тақырыптық викторинамен жалғасты. Мұндай танымдық формат балалардың алған білімдерін бекітіп қана қоймай, ұлы ойшылдың мұрасымен танысуды қызықты әрі есте қаларлықтай ете түсті.

Аталған іс-шара мәдени бастамалардың жас ұрпақтың тарихи және рухани тамырымен байланысын нығайтуға, сондай-ақ Германиядағы отандастар арасында қазақ мәдениетіне деген қызығушылықты арттыруға ықпал ететінінің тағы бір көрінісі болды.

Абай Құнанбайұлының ескерткіші 2021 жылы Берлин қаласында ашылып, Қазақстан мен Германия арасындағы достық пен мәдени байланыстардың символына айналды. Ескерткіш Абайдың есімі берілген көшенің тікелей маңында орналасқан.