Қазақстан Елшісі Әзербайжан Орталық банкінің Төрағасымен кездесті

Қазақстан Республикасының Әзербайжандағы Елшісі Әлім Байел осы елдің Орталық банкінің Төрағасы Талех Кязымовпен кездесті.

Ә. Байел қазақ-әзербайжан қатынастарының, оның ішінде экономикалық өзара іс-қимылдың жоғары деңгейіне назар аударды. Атап айтқанда, Әзербайжан Орталық банкімен Қазақстанның Ұлттық Банкі, ҚР Қаржы нарығын реттеу және дамыту агенттігі және Астана халықаралық қаржы орталығы жемісті қарым-қатынас орнатқан.

Сондай-ақ, дипломат Т. Кязымовты 2025 жылғы 27 мамырда Астанада өтетін ТМҰ-ға мүше мемлекеттердің орталық банктері Кеңесінің бірінші отырысына шақырды.

Өз кезегінде АР ОБ Төрағасы аталған іс-шараға қатысатынын растап, Кеңесті құру жөніндегі бастаманы қазақ тарапының ұсынғанын ерекше атап өтті. Ол сондай-ақ екі елдің орталық банктері тәжірибе алмасу бойынша және халықаралық алаңдарда табысты ынтымақтастық жүргізіп жатқанына назар аударды.

Кездесу барысында қазақ-әзербайжан мемлекетаралық қатынастарына арналған естелік монета басып шығару мүмкіндігі талқыланды.