Қазақстандық суретшінің көрмесі Бакуда ашылды

Әзербайжан Суретшілер одағының Ваджия Самедова атындағы көрме галереясында танымал қазақстандық суретші Батухан Байменнің NOMAD: BLACK & WHITE атты көрмесінің салтанатты ашылуы өтті. Ашылу рәсіміне Қазақстанның Әзербайжан Республикасындағы Елшісі Әлім Байел, Әзербайжан Мәдениет министрінің орынбасары Саадат Юсифова және Әзербайжан Суретшілер одағының төрағасы Фархад Халилов қатысты.

Елші Ә. Байел көрме ұйымдастырушыларына қазақстандық суретшіге көрсеткен қолдауы үшін алғысын білдіріп, Б. Байменнің туындыларында түркі халықтарына ортақ тарих, мәдениет және тұрмыстың көрініс тапқанын атап өтті. Дипломат мұндай іс-шаралардың бауырлас елдер арасындағы ынтымақтастықты нығайтудағы маңыздылығына назар аударды.

Батухан Баймен – Қазақстанның қазіргі заманғы ең танымал график-суретшілерінің бірі. Оның шығармалары ауқымдылығымен, терең оймен және ерекше дала бояуымен ерекшеленеді. Заманауи бейнелеу өнеріндегі жаңа бағыттарды ұстана отырып, ол өз шығармашылығында ата-бабаларымыздың көшпелі мәдени мұрасынан шабыт алады. Оның туындыларында ежелгі түркілердің тарихы мен көшпенділер әлемі көрініс табуда.

Суретші өз графикалық жұмыстарында Абай Құнанбайұлы, Шыңғыс Айтматов, Әлишер Науаи шығармаларынан шабыт ала отырып, түркі халықтарының философиялық ортақ аспектілерін зерттеп, талдайды.