Бакуда қазақ киносының марафоны өтті

Әзербайжандағы Қазақстан кинематографиясына арналған ай қазақ режиссері Айдын Сахаманның аңызға айналған «Дос-Мұқасан» музыкалық ансамблі туралы фильмімен ашылды. Әзербайжан көрерменіне сондай-ақ Олжас Нұрбайдың «Алаяқтар» фильмі ұсынылды. Бұл картинада адамдарды алдаудың кең таралған схемалары мен сценарийлері, сондай-ақ олардан сақтану жолдары көрсетілген.

Киномарафонның қорытындысы ретінде Айдын Сахаманның тарихи туындысы – «Қазақ хандығы. Алмас қылыш» фильмі көрсетілді. Фильм XV ғасырдағы оқиғаларға негізделген, онда Керей мен Жәнібек хандардың жаңа мемлекет құруы туралы баяндалады.

Іс-шараларға Қазақстан Республикасының Әзербайжандағы Елшісі Әлім Байел, зиялы қауым, дипломатиялық корпус, БАҚ өкілдері, тарихшылар, сарапшылар, Бакуда тұратын қазақстандықтар мен өнерсүйерлер қатысты.

Елші Ә. Байел қазақ киносының қарқынды дамып келе жатқанын атап өтті. Ол Қазақстан мен Әзербайжанда тарихты зерттеуге деген қызығушылықтың артып келе жатқанына да ерекше мән берді. Осы тұрғыдан, екі елде де тарихи фильмдердің түсірілуі жоғары бағаға лайық. Дипломат мұндай бастамаларды түркілік сананы және түркі бірлігін нығайтудың маңызды факторы ретінде ілгерілетудің қажеттігін атап өтті. Сондай-ақ Елші Қазақстан мен Әзербайжан бірлесіп көркем фильм түсіруді жоспарлап отырғанын хабарлады.

Фильмдер ашық аспан астындағы кинотеатр форматында көрсетілді. Қазақ киносы айы аясында дарынды әзербайжандық музыканттар мен әншілердің қатысуымен концерттік бағдарламалар да ұйымдастырылды.