Қазақстан мен Грекия әділет саласындағы ынтымақтастықты кеңейтіп келеді

Афина қаласы, 2025 жылғы 4 қыркүйек — Грекия Республикасының Әділет министрлігінде Қазақстан Республикасының Грекиядағы Елшісі Тимур Сұлтанғожин Грекияның Әділет министрі Георгиос Флоридиспен кездесті.

Келіссөздер барысында тараптар құқық саласындағы қазақстан-грек ынтымақтастығының ағымдағы жағдайы мен болашағын талқылады. Әсіресе сот сараптамасы, әділетті цифрландыру, заң саласында жасанды интеллектіні қолдану, сондай-ақ құқық қолдану мен нормативтік рәсімдерді автоматтандыру мәселелеріне ерекше назар аударылды.

Екі елдің салалық ведомстволары арасындағы ынтымақтастықты тереңдету мүмкіндіктері қарастырылды. Атап айтқанда, ведомствоаралық келісімдер жасасу, шарттық-құқықтық базаны дамыту және әділет саласында бірлескен іс-шаралар өткізу мүмкіндігі талқыланды.

Қазақстан тарапынан құқықтық жүйені жаңғырту жөніндегі бірқатар бастамалар таныстырылды. Олардың ішінде сот тәжірибесіне цифрлық платформаларды енгізу, «Digital Justice» жүйесінің жұмыс істеуі және құқықтық қызметтерге онлайн қолжетімділікті қамтамасыз ету мәселелері бар.

Кездесу барысында Қазақстан Республикасында жүргізіліп жатқан әлеуметтік-саяси реформалардың негізгі бағыттары да сөз болды. Атап айтқанда, құқық үстемдігін нығайту, сот билігінің тәуелсіздігі кепілдіктерін арттыру, адам құқықтары институттарын реформалау, соның ішінде Конституциялық сот құру және Омбудсмен кеңсесінің институционалдық дамуы талқыланды.

Тараптар сарапшылар алмасу, оқу-үйрету іс-шараларын ұйымдастыру, сондай-ақ құқық саласында екіжақты келісім жобаларын пысықтау арқылы практикалық ынтымақтастықты кеңейтуге мүдделілігін растады.

Кездесу соңында азаматтардың құқықтарын қорғауға және құқық қолдану тәжірибесінің тиімділігін арттыруға баса назар аудара отырып, әділет саласындағы диалогты әрі қарай нығайтуға және ынтымақтастықты кеңейтуге өзара дайындық білдірілді.

Қазақстан Республикасының Грекиядағы Елшілігі