Қазақстан мен Қалмық Республикасы шекара маңы және өңіраралық ынтымақтастықты кеңейтуде

Қалмық Республикасының Басшысы Бату Хасиковтың шақыруымен Элиста қаласына Атырау облысы әкімінің орынбасары Марат Мурзиев бастаған делегация жұмыс сапарымен барды. Ресми іс-шаралар мен келіссөздерге Қазақстан Республикасының Астрахандағы Бас консулы Қанат Хасенов қатысты. Сапардың басты мақсаты — өңірлер арасындағы сауда-экономикалық байланыстар мен мәдени-гуманитарлық ынтымақтастықты кеңейту.

Кездесу барысында тараптар Каспий маңы өңіріндегі бірлескен сауда-экономикалық және көлік-логистикалық жобаларды ілгерілетуді егжей-тегжейлі талқылады. Ресми тұлғалар ауыл шаруашылығы саласындағы, соның ішінде асыл тұқымды мал шаруашылығын дамытудағы кооперацияның нақты мүмкіндіктеріне, сондай-ақ ғылым, экология және туризм салаларындағы өзара іс-қимылға ерекше назар аударды. Гуманитарлық салада жоғары оқу орындары арасындағы алмасуды кеңейту және бірлескен мәдени іс-шараларды өткізу жоспарлары белгіленді. Сонымен қатар, кездесуге қатысушылар Қалмықия аумағында тұратын қазақ диаспорасына жан-жақты қолдау көрсетудің маңызды мәселелерін қозғады.

Сапар бағдарламасы аясында қазақстандық делегация Элиста қаласындағы «Ставка кочевника» алаңында басталған XXVI Ресейлік асыл тұқымды қой мен ешкі көрмесінің салтанатты ашылуына да қатысты.