Ұлттық академиялық кітапханада кітап және фото көрмесі өтеді

Бүгін ҚР Ұлттық академиялық кітапханасында кітап және фото көрмесі өтеді.

Кітап көрмелері Алтын Орданың 750 жылдығы, әлемге әйгілі ойшыл Әл-Фарабидің 1150 жылдығы мен ұлы Абайдың 175 жылдық мерейтойына арналған.

«Абай тағылымы» атты иллюстративті-кітап көрмесі ұлы Абайдың өмір жолы мен шығармалары, дүниетанымы мен баға жетпес мұрасымен таныстыратын 8 бөлімнен тұрады. «Қалың елім қазағым...», «Абай туралы», «Абайдың дүниетанымы», «Абай шығармалары туралы», «Қазақ халқының рухани асыл мұрасы», «Мерзімді басылымдар Абай туралы сыр шертеді», «Абай» романы – қазақ өмірінің айнасы, үлкен шежіресі», «Абайдың бейнесі суреткерлер көзімен» атты бөлімдерде ұлы Абай тек қазақ халқының ғана ақыны емес, әлемдік әдебиетке ортақ тұлға ретінде көрсетіледі.

«Әл-Фараби мұрасы» атты кітап көрмесінде Әбу Насыр әл-Фарабидің өмірі мен қызметі жайында баяндайтын 400-ден астам кітап, фотосуреттер, карталар мен дәйексөздер ұсынылады. Көрме 5 бөлімнен тұрады.

«Айбынды Алтын Орда» атты кітап көрмесінде Алтын Орда мемлекетінің құрылуын, даму тарихын, күйреуін баяндайтын 160-қа таман кітап, фотосурет, карта мен дәйексөздер ұсынылады. Көрме 3 бөлімнен тұрады: Алтын Орда мемлекетінің құрылуы, Алтын Орда мемлекетінің даму тарихы мен ыдырауы және Ұлытау - хандар мекені.

Сонымен қатар, «Әлемді жақсы жаққа өзгерт» атты Еріктілер жылына арналған кітап және фотокөрме ұйымдастырылып отыр. Көрменің мақсаты – еріктілік бастамалардың қарқынды дамуына қолдау көрсету және ҚР-да волонтерлік мəдениетті дамыту мақсатында ақпараттық қолдау көрсету.

Ал «Журналистика ─ дәстүр мен жаңашылдық жаршысы» атты кітап және фотокөрмесі келушілерді Ұлттық академиялық кітапхана қорындағы қазақ журналистикасының тарихы мен бұқаралық ақпарат құралдарының дамуына арналған кітаптармен таныстырады.