ҚР Цифрлық даму, инновациялар және аэроғарыш өнеркәсібі министрлігі мен Қазақстан Республикасындағы Біріккен Ұлттар Ұйымының Даму бағдарламасы (бұдан әрі - БҰҰДБ) бірлескен жобасы шеңберінде 2025 жылғы 15 наурызда «SimulTrain» симуляциялық ойыны негізінде жобалық басқару бойынша тренинг өткізілді.
«SimulTrain» интерактивті компьютерлік ойыны қауіпсіз және динамикалық ортадағы нақты жағдайларды модельдеу арқылы жобалар мен бағдарламаларды басқару бойынша оқытудың инновациялық әдісі болып табылады. Модельдеу барысында қатысушылар уақыт, ресурстар және қаржы бойынша шешімдер қабылдады және жобалар мен бағдарламаларды басқарудың тиімділігін арттыруға ықпал ететін жоспарлау, тәуекелдерді басқару, ресурстарды тиімді бөлу және коммуникация дағдыларын дамытуға мүмкіндік беретін шешімдерінің салдарын бағалай алды.
Іс-шараға қатысушыларға Қазақстан Республикасы Цифрлық даму, инновациялар және аэроғарыш өнеркәсібі министрлігінің Бірінші вице-министрі Қ А. Төлеушин және БҰҰДБ Қазақстандағы Тұрақты өкілінің орынбасары С.Ф. Ходжиматов құттықтау сөз сөйледі.
Тренингке 45-ке жуық адам, оның ішінде саяси мемлекеттік қызметшілер, сондай-ақ Президент Әкімшілігінің, Үкімет Аппаратының, орталық мемлекеттік органдар мен әкімдіктердің қызметкерлері қатысты.
Анықтамалық:
«SimulTrain» симуляциялық ойынының серіктестері IPMA (International project management association), KPMA (Kazakhstan project management association), IPM2 (International project management masters) сияқты ұйымдар болып табылады.
«Ұлттық ақпараттық технологиялар» АҚ (ҰАТ) қолдау көрсетілетін жобалардың бүкіл цифрлық экожүйесінің тұрақты жұмысын қамтамасыз ету мақсатында жоспарлы техникалық жұмыстар жүргізілетінін хабарлайды.
Техникалық жұмыстар 2025 жылғы 20 наурыз күні сағат 23:00-ден бастап 2025 жылғы 21 наурыз күні сағат 08:00-ге дейін жүргізіледі.
Бұл уақыт аралығы пайдаланушылардың ең төменгі белсенділігі ескеріле отырып таңдалды, осылайша қолайсыздықтарды барынша азайту көзделіп отыр.
Аталған кезеңде келесі мемлекеттік электрондық сервистерге уақытша қолжетімділік шектеледі:
• eGov.kz порталы және eGov mobile мобильді қосымшасы («Цифрлық құжаттар» сервисін қоса алғанда);
• e-Otinish, E-license порталдары және Ашық үкімет жүйелері;
• Қазақстан Республикасының Ұлттық куәландырушы орталығының (ҰКО) сервистері;
•«ҰАТ» АҚ сүйемелдейтін өзге де жобалар;
• Электрондық үкімет шлюзі арқылы интеграцияланған екінші деңгейлі банктердің мобильді қосымшаларындағы және басқа да жүйелердегі мемлекеттік қызмет көрсету сервистері.
Мүмкін болатын қолайсыздықтардың алдын алу үшін «ҰАТ» АҚ барлық қажетті операцияларды алдын ала аяқтауды және қажет болған жағдайда құжаттардың түпнұсқаларын дайындауды ұсынады.
Түсіністік танытқандарыңыз үшін алғыс білдіреміз және уақытша қолайсыздықтар үшін кешірім сұраймыз!
Astana Hub-та «Жасанды интеллект туралы» заң жобасын талқылауға арналған кездесу өтті. Іс-шараға Қазақстан Республикасының Цифрлық даму, инновациялар және аэроғарыш өнеркәсібі министрі Жаслан Мәдиев, ҚР Парламенті Мәжілісінің депутаты, «Respublica» партиясының төрағасы Айдарбек Ходжаназаров, Жасанды интеллектті дамыту қауымдастығының өкілдері, жетекші сарапшылар және қазақстандық IT-қоғамдастық өкілдері қатысты.
Қатысушылар заң жобасының негізгі аспектілерін, жасанды интеллект технологияларын реттеудің ықтимал қауіптері мен артықшылықтарын, инновациялық жобаларды қолдау тетіктерін, сондай-ақ Қазақстанда жасанды интеллектті дамыту үшін деректердің қолжетімділігін қамтамасыз ету жолдарын талқылады.
«Жасанды интеллект туралы» заң жобасы жасанды интеллекттің дамуы үшін құқықтық жағдайларды жасау, технологиялардың ашықтығы мен қауіпсіздігін қамтамасыз ету, сондай-ақ экономиканың бәсекеге қабілеттілігін арттыру мақсатында ҚР Парламенті Мәжілісі депутаттарының бастамасымен әзірленді. Құжатта жасанды интеллект жүйелерін жіктеу, deepfake-контенттің таралуын болдырмау үшін өнімдерді таңбалау, авторлық құқықтарды реттеу, тұтынушылардың құқықтарын қорғау және жасанды интеллект саласындағы халықаралық ынтымақтастық мәселелері қарастырылған.
Қазіргі уақытта заң жобасы 13 мемлекеттік орган және ұйыммен келісіліп, Қазақстан Республикасы Парламенті Мәжілісінің қарауына енгізілді.
ҚР ЦДИАӨМ Баспасөз қызметі
Заң талаптарын сақтау және есептілікті тапсыру мен ЭЦҚ-ға қатысты басқа да әрекеттерді кедергісіз орындау мақсатында заңды және жеке тұлғаларға келесі заңды механизмдерді қолдану ұсынылады:
– Ресми сенімхат рәсімдеу
Қазақстан Республикасының «Электрондық құжат және электрондық цифрлық қолтаңба туралы» Заңының 10-бабының 3-тармағына сәйкес, заңды тұлғаның басшысы немесе оны алмастыратын тұлға осы заңды тұлғаның қызметкеріне немесе оның тағайындаған тұлғасына (соның ішінде аутсорсингтік ұйымдарға) электрондық құжатқа қол қою құқығын бере алады.
Жеке тұлға немесе жеке кәсіпкер қол қою құқығын есепшіге немесе басқа уәкілетті тұлғаға беру үшін нотариалды куәландырылған сенімхат рәсімдей алады. Бұл ретте әрбір тұлға өз атына алынған ЭЦҚ-ны пайдалануы тиіс.
Қажет болған жағдайда аталған сенімхаттар тиісті мемлекеттік органдарда тіркелуге жатады.
– Басшының жеке ЭЦҚ-ны пайдалануы
Басшыларға есептілікті өз бетінше қол қою ұсынылады, бұл ЭЦҚ-ны пайдалану кезінде жеке жауапкершілік қағидатын сақтауға кепілдік береді.
Одан бөлек, жеке және заңды тұлғалар өздеріне тиесілі ЭЦҚ-ның заңсыз қол жеткізілуі мен пайдаланылуына жол бермеу үшін қажетті шараларды қабылдауға міндетті.
Тиісті шараларды қабылдамаған тұлғаларға әкімшілік жауапкершілік көзделген.
Электрондық цифрлық қолтаңба (ЭЦҚ) қол қоюшы тұлғаның өз қолымен қойған қолымен тең дәрежеде танылады және Қазақстан Республикасының электрондық құжат және ЭЦҚ туралы заңнамасының талаптары сақталған жағдайда бірдей заңдық салдарға әкеледі.
Айта кету керек, электрондық цифрлық қолтаңбаның жабық кілтін басқа тұлғаларға заңсыз беру үшін жауапкершілік 2016 жылғы 1 қаңтардан бастап күшіне енді.
Қазақстан Республикасының заңнамасына жақында енгізілген өзгерістерге сәйкес, басқа тұлғаның ЭЦҚ-ны пайдаланғаны үшін жауапкершілік қарастырылған. Осыған байланысты жеке және заңды тұлғалар, сондай-ақ жеке кәсіпкерлер (ЖК) Қазақстан Республикасының заңнамалық нормаларына қатаң сәйкестікте есептілікті, келісімшарттарды және басқа электрондық құжаттарды рәсімдеу мен қол қоюды, сондай-ақ ЭЦҚ-ны пайдалана отырып, кез келген әрекеттерді (авторизация, жеке деректерге қол жеткізу және т.б.) орындауды қамтамасыз етуі қажет.
ҚР ЦДИАӨМ Баспасөз қызметі
Енді жеке және заңды тұлғалардың дербес деректерді қорғау және электрондық цифрлық қолтаңба салаларындағы әкімшілік құқық бұзушылықтар үшін әкімшілік жауапкершілікке тарту мерзімі құқық бұзушылық жасалған күннен бастап екі айдан бір жылға дейін ұзартылды. Жаңа нормалар 2025 жылғы 13 наурыздан бастап күшіне енді.
Сонымен қатар, дербес деректер және оларды қорғау туралы заңнаманы бұзу, атап айтқанда, дербес деректерді заңсыз жинау, өңдеу және оларды қорғау шараларын сақтамау үшін ҚР ӘҚБтК-нің 79-бабы бойынша әкімшілік айыппұлдардың мөлшері үш есе ұлғайтылады. Бұрын айыппұлдар құқық бұзушылықтың құрамына және кәсіпкерлік субъектісінің санатына байланысты 10-нан 1000 АЕК-ке дейін өзгеріп отырған. Енді олар 30-дан 2000 АЕК-ке дейін ұлғайтылады.
Бұдан бөлек, Қазақстан Республикасының электрондық құжат және электрондық цифрлық қолтаңба туралы заңнамасын бұзғаны үшін ҚР ӘҚБтК-нің 640-бабы бойынша жаңа әкімшілік құқық бұзушылық түрі күшіне енеді. Яғни, басқа адамның ЭЦҚ кілтін пайдаланғаны үшін әкімшілік жауапкершілік қарастырылады.
Бұған дейін әкімшілік жауапкершілік тек ЭЦҚ кілтін үшінші тұлғаларға заңсыз беру және оны қорғау бойынша тіркеу куәлігінің иесі тарапынан қажетті шараларды қабылдамау жағдайларына ғана қолданылатын. Енді өзгерістер күшіне енгеннен кейін, ЭЦҚ-ны заңсыз берген де, оны пайдаланған тұлғалар жауапкершілікке тартылады.
Қабылданған шаралар азаматтардың жеке деректерін қорғауды күшейтуге, электронды цифрлық қолтаңбаны пайдалану қауіпсіздігін қамтамасыз етуге және ЭЦҚ-ға байланысты алаяқтық әрекеттерді азайтуға, сондай-ақ ақпараттандыру саласындағы бұзушылықтар үшін жауапкершілікті арттыруға бағытталған.
ҚР ЦДИАӨМ баспасөз қызметі
Қазақстан Республикасы Президентінің 2024 жылғы Курултайда айтылған тапсырмаларын орындау аясында Цифрлық даму, инновациялар және аэроғарыш өнеркәсібі министрлігі маңызды инфрақұрылымдық жобалар бойынша жүйелі жұмысты жалғастыруда.
Маңызды жобалардың бірі – Каспий теңізі арқылы су астындағы оптикалық талшықты байланыс желісін (ОТБЖ) салу. 2025 жылғы 3 наурызда Caspinet B.V. бірлескен кәсіпорны EPC-merқұрылысшы компаниясымен желі жобалауға және құрылысқа келісімшартқа қол қойды, бұл деректерді беру үшін баламалы маршрутты дамытуда маңызды кезең болды.
Жоба Қазақстан Үкіметінің қаулысымен бекітілген үкіметаралық келісімге сәйкес жүзеге асырылуда. Су астындағы құрылыс қиындықтарына және техникалық әрі логистикалық көптеген аспектілерді үйлестіру қажеттілігіне қарамастан, жұмыстар белгіленген кестеге сәйкес жүргізілуде. Тапсырмалардың үзіліссіз орындалуын қамтамасыз ету мақсатында қосымша серіктестермен барлық туындаған мәселелер мұқият талқылануда.
Бұл магистралдың құрылуы Қазақстанға халықаралық телекоммуникациялық желілерге сенімді қосылуды қамтамасыз етеді, байланыс инфрақұрылымының тұрақтылығын арттырады, Азия мен Еуропа арасындағы деректер транзиті нарығында рөлін күшейтеді, сондай-ақ бизнестің және мемлекеттік қызметтердің жаңа мүмкіндіктерін ашады.
Тағы бір стратегиялық бағыт – жасанды интеллектіні дамыту үшін жоғары өнімді есептеу қуаттарын кеңейту. Бұл процесс кезең-кезеңімен дамып, кешенді тәсілді талап етеді.
Алғашқы қадам өткен жылы жүзеге асырылды: «Ұлттық ақпараттық технологиялар» акционерлік қоғамының Tier 3 деңгейіндегі жаңа деректер өңдеу орталығында суперкомпьютерлік қуаттар орналастырылды. Олар қазір мемлекеттік цифрлық қызметтердің жұмысында, соның ішінде e-Gov қосымшасында қолданылуда.
Сондай-ақ мемлекет пен бизнестің ынтымақтастығы аясында ел ішінде де, сыртында да суперкомпьютерлік кластер құрылуда, ол ғылыми зерттеулер, KazLLM оқыту және отандық жасанды интеллект өнімдерін әзірлеу үшін қолданылуда. Қазіргі уақытта Қазақстанда ағымдағы қажеттіліктерді қамтамасыз ету үшін қажетті есептеу қуаттары бар.
Маңыздысы, суперкомпьютерлік ресурстарды ұлғайту үдерісі үздіксіз жүретін процесс екенін түсіну қажет. Есептеу қуаттарына сұраныс жылдам өсіп келеді, ал технологиялар барған сайын көбірек ресурстарды талап етеді. Сондықтан ЦДИАӨМ цифрлық инфрақұрылымды кезең-кезеңімен салуды жалғастыруда, елдің болашақтағы жоғары технологиялар саласындағы дамуына негіз қалап отыр.
Осы орайда, жасанды интеллектіні дамыту бүгінгі таңда суперкомпьютерлік чиптер өндіруші елдер тарапынан ұлттық қауіпсіздік және экономикалық бәсекеге қабілеттілік мәселесі ретінде қарастырылатынын атап өткен жөн. Бұл елдер ЖИ технологияларына бақылау жасау саясатын жүргізіп, есептеу қуаттарының экспортын реттеуді жүзеге асыруда, бұл мәселені ядролық қауіпсіздік пен қаржы нарықтарының тұрақтылығының маңыздылығына теңестіріп отыр.
Осыған байланысты осы елдердің үкіметтері экспорттық лицензияларды беру тәртібін қатаңдатуда. Рұқсат алу процесі ұзақ уақытты талап етіп, реттеуші талаптарға сәйкестікті сақтауды қажет етеді. Қазіргі уақытта Қазақстан алдыңғы қатарлы есептеу қуаттарына қол жеткізу және жасанды интеллектіні дамыту мүмкіндіктерін кеңейту мақсатында осындай лицензияны алу жұмыстарын жүргізуде.
ҚР ЦДИАӨМ баспасөз қызметі
Қазақстан Республикасының Цифрлық даму, инновациялар және аэроғарыш өнеркәсібі министрлігі 2025 жылғы 3-9 наурыз аралығында eGov mobile мобильді қосымшасында жүргізілген жасанды интеллектіні (ЖИ) қолдану жөніндегі сауалнаманың нәтижелерін жариялады.
Апталық сауалнамаға Қазақстанның барлық өңірлерінен 53 мыңнан астам азамат қатысып, нәтижелер халықтың тек ЖИ қолдануды ғана емес, сондай-ақ жаңа технологияларды үйренуге деген қызығушылығын көрсетті.
Респонденттердің 79%-ы ЖИ-мен жұмыс істеу дағдыларын меңгеруге ниетті екенін білдіріп, бұл құралдың болашақтағы маңызды рөлін түсінетіндігін атап өтті. Сонымен қатар, 65% респонденттер күнделікті өмірде жасанды интеллектіні қолданса, қалған 35% оны кәсіби қызметте пайдаланады.
ЖИ күнделікті тапсырмаларды алмастыра ала ма деген сұраққа 47% қатысушы адам бақылауының әлі де қажетті екенін атап өтті. Тағы 29%-ы жұмыс орындарының қысқаруы туралы алаңдаушылық білдірсе, 22%-ы технологиялар адамдарға күрделі тапсырмаларға назар аударуға мүмкіндік беретіндігіне сенімді. Сауалнама азаматтардың цифрлық сауаттылығын да анықтады. Респонденттердің тек 22%-ы ЖИ-ді жақсы меңгерсе, 43%-ы оған жалпы мағлұматқа ие, бірақ оны сирек қолданады, ал 34%-ы бұл технология туралы ештеңе білмейді.
Сондай-ақ, ең белсенді дауыс бергендер 30 бен 45 жас аралығындағы азаматтар болды, олар сауалнамаға қатысушылардың 48%-ын құрады.
Қазақстан Республикасының Цифрлық даму, инновациялар және аэроғарыш өнеркәсібі вице-министрі Ростислав Коняшкин қоғамның ЖИ-ге деген жоғары қызығушылығы цифрлық білім беру үшін жаңа мүмкіндіктер ашатынын атап өтті: «Біз қоғамның цифрлық дағдыларды үйренуге деген зор сұранысын көріп отырмыз және бұл даму үшін тамаша мүмкіндік. Министрлік Қазақстан азаматтарына жасанды интеллект технологияларын меңгеруге көмектесетін қолжетімді білім беру бағдарламаларын әзірлеу бойынша жұмысын жалғастырады. Сауалнама нәтижелері цифрлық шешімдерге қолжетімділікті арттыруға бағытталған жаңа бастамалардың негізі болады, олар өмірді ыңғайлы әрі тиімді етеді».
ЦДИАӨМ баспасөз қызметі
3-6 наурыз аралығында Барселонада Mobile World Congress (MWC) 2025 дүниежүзілік мобильді конгресі өтуде. Биылғы жылы шараның негізгі тақырыптары ретінде – генеративті жасанды интеллект, ақылды қалалар, 5G интернеті, қауіпсіздік және eSIM таңдалды.
Mobile World Congress — әлемдегі ең ірі технологиялар, байланыс және инновациялар саласындағы оқиға, ол сала көшбасшыларын, әлемдік инвесторлар мен стартаперлерді бір аренада жинайды.
Бұл жылы осындай үлкен алаңда Қазақстан KazLLM тілдік моделін таныстырды. KazLLM үлкен тілдік моделі қазақ, ағылшын, орыс және түрік тілдерінде 150 миллиард токен негізінде жүзеге асырылған. Модель Назарбаев Университетінің Ақылды жүйелер және жасанды интеллект институтының (ISSAI) командасы тарапынан МЦРИАП РК және МНВО РК қолдауымен және үйлестіруімен әзірленген.
Ұлттық тілдік модельді жасау барысында Beeline Қазақстан және оның QazCode IT компаниясы негізгі серіктес болды.
Жоба тілдік топтардың жеткіліксіз ұсынылған тобы арасындағы алшақтықты жоюға бағытталған, бұл технологияларды баршаға қолжетімді етеді. Сонымен қатар, KazLLM халықаралық мойындауға ие болды — ол GSMA Foundry Excellence Award 2025 сыйлығының «Жасанды интеллект» санатында жеңімпаз атанды, бұл оның жоғары сапасы мен технологиялық прогресс үшін маңыздылығын дәлелдейді.
Осы орайда, испандық каталон тілінде жасалатын ұқсас тілдік моделінің құрылуы жарияланды. Авторлардың айтуынша, жаңа жасанды интеллект моделі Испания Корольдік академиясы (RAE), Испан тіл академияларының қауымдастығы (ASALE) және Барселонадағы суперкомпьютерлік орталықпен бірлесіп әзірленетін болады.
Бұл екі әзірлеменің тәжірибесі әлемде жасанды интеллект пен тілдік модельдердің дамуы үшін, сондай-ақ монотілдер — қазақ, каталон және басқа тілдерді танымал ету және пайдалану үшін маңызды.
ҚР ЦДИАӨМ баспасөз қызметі
3-9 наурыз аралығында Цифрлық даму министрлігі азаматтар арасында жасанды интеллект (ЖИ) технологияларын қолдану туралы сауалнама жүргізеді. Сауалнамаға eGov mobile мобильді қосымшасы арқылы «Хабарламалар» бөлімінде қатысуға болады.
Сауалнама бес сұрақтан тұрады — ЖИ туралы білім мен оны қолдану, оның шешімдеріне деген сенім және жаңа технологиялармен жұмыс істеуге дайындық туралы.
Сауалнама нәтижелері бойынша талдау жасалып, олар цифрлық дағдыларды дамыту және ЖИ-ді күнделікті өмірге енгізу бойынша келешектегі бастамалар үшін негіз болады.
Бұған дейін, 3 наурызда, Мәжілісте Қазақстанда ЖИ-ді қолданудың ашық әрі түсінікті ережелерін жасауға бағытталған «Жасанды интеллект туралы» заң жобасы таныстырылды.
ҚР ЦДИАӨМ баспасөз қызметі
Қазақстан шетелдік ІТ мамандарына жаңа мүмкіндіктер ашатын «Digital Nomad Residency» пилоттық жобасын ұсынды. Бағдарламаның мақсаты - әлемдік ІТ таланттарын елге жұмыс істеуге және тұрақты тұруға тарту, оның қарқынды дамып келе жатқан цифрлық экономикасының бір бөлігі болу.
«Digital Nomad Residency» бағдарламасы ІТ саласында жұмыс істейтін шетелдік мамандарды тартуға бағытталған. Ол Қазақстанда тұрақты тұруға рұқсат алу мүмкіндігін жеңілдетілген түрде ұсынады.
Жеке сәйкестендіру нөмірі (ЖСН) және электронды цифрлық қолтаңбасы (ЭЦҚ) болған жағдайда, шетелдік IT маманы сұранысқа ие мамандықтар тізіміне сәйкестігі үшін салалық мемлекеттік органның өтінішін алу үшін Astana Hub порталына өтініш береді. Кандидат шетелдік паспорт көшірмесін, түйіндемесін, портфолиосын, мотивациялық хатын, сотталмағаны туралы куәлігін және 3,5*4,5 түсті фотосуретін ұсынады. Нәтижесінде, кандидат Қазақстанның Цифрлық даму, инновациялар және аэроғарыш өнеркәсібі министрлігінен өзінің біліктілігін және IT маманы мәртебесін растайтын өтініш алады.Осыдан кейін, шетелдік IT маманы тұрақты тұруға рұқсат алуды алдын ала мақұлдау үшін eGov.kz порталында қызметке өтініш беруі керек.
Қызметті пайдалану үшін:
- eGov.kz порталында тіркеліп, "Азаматтарға" - "Азаматтық, көші-қон және иммиграция" - "Шетелдіктерге: ҚР-ға кіру және азаматтық" бөліміне өту қажет;
- "Шетелдік IT мамандарына Қазақстан Республикасында тұрақты тұруға рұқсат беру" қызметін таңдап, "Қызметке онлайн тапсырыс беру" батырмасын басу керек;
- көші-қон полициясының басқармасын таңдау керек;
- шетел паспортының көшірмесін (өтініш берген кезде паспорттың жарамдылық мерзімі 180 күнтізбелік күннен артық болуы керек), ҚР шетел офисінің консулы куәландырған аудармасымен, 35x45 мм сандық фотосуретті қосу керек;
- ЦДИАӨМ өтінішін қажет мамандықтардың тізіміне сәйкес келтіру керек;
- тиісті мемлекеттің құзыретті органы берген азаматтық және/немесе тұрақты тұрғылықты мемлекетте сотталмағандығы туралы заңдастырылған құжатты қосаңыз және "Келесі" батырмасын басу керек;
- қажетті жолақтарды толтыру керек;
- қызметті ЭЦҚ арқылы қол қою керек;
- өтінім сауалнамасын жүктеп, танысу керек;
- ақпараттық жүйелерде заңмен қорғалған құпияны құрайтын ақпаратты пайдалануға келісім беру керек;
- жүктелген және толтырылған өтінім сауалнамасын тіркеу керек;
- өтінімді жіберу қажет;
- қызмет нәтижесі пайдаланушының Жеке кабинетінде «Қызмет тарихы» бөлімінде қолжетімді болады.
Өтінімді қарау мерзімі - 45 күнтізбелік күн. Содан кейін мамандар Қазақстанға келіп, Халыққа қызмет көрсету орталығының кеңселерінде рәсімдеуді аяқтай алады.
Қосымша ақпаратты Astana Hub ресми веб-сайтынан табуға болады.
Жоба ҚР Цифрлық даму, инновациялар және аэроғарыш өнеркәсібі министрлігі Мемлекеттік қызметтер комитетінің, "Ұлттық ақпараттық технологиялар" АҚ, ҚР Сыртқы істер министрлігі, ҚР Ішкі істер министрлігінің Көші-қон қызметі комитеті, ҚР Ұлттық қауіпсіздік комитеті және "Инновациялық технологиялар паркі" автономиялық кластерлік қорының бірлескен жұмысының арқасында жүзеге асырылды.
ҚР ЦДИАӨМ баспасөз қызметі