Солоновка ауылының тұрғыны, өз ісінің шебері болған Жұртбаева Магазия Қасенғазықызына құрмет көрсетілді

Бүгінгі күні Магазия Қасенғазықызының есімі – «Қазақстанның Алтын кітабына» енгізіліп, медаль табысталды. Бұл - өлшеусіз құрмет пен биік беделдің нышаны болды.

Бүгін осындай ардақты жанға қошемет көрсету мақсатында аудандық мәслихат төрағасы Жанар Сыдыкова Солоновка орта мектебіне барып, аудан әкімі атынан Алғыс хат табыстады.

Іс шараға мектеп ұжымы, ардагер ұстаздар, ауылдық округ әкімі Ренат Ақылтай, аудандық білім бөлімінің әдіскері Жарас Тұрысбекұлы қатысты.

Өмірін білім мен ғылымға арнап, сан мыңдаған шәкірттің жүрегіне жол тауып, болашаққа бағыт берген ұлы ұстаз – Жұртбаева Магазия Қасенғазықызының еңбегі – шын мәнінде өшпес мұра, биік өнеге.

1936 жылы дүниеге келіп, бар саналы ғұмырын ұстаздық жолға арнаған, 46 жыл бойы математика мен физикадан дәріс берген, талай шәкірттің жүрегіне білім шырағын жаққан қадірлі жан – бүгінгі біздің ортақ мақтанышымыз.

Адал еңбегі үшін ол кісіге берілген марапаттар – тек құрмет белгісі емес, ұрпақ алдындағы өлшеусіз еңбектің айғағы.
«Қазақ КСР-інің халық ағарту ісінің үздігі», «КСРО ағарту ісінің үздігі», «Аға мұғалім» атағы, «Еңбектегі ерлігі үшін» медалі – бәрі де оның еңбегіне берілген лайықты баға.