Мәслихат төрағасының Құрылысшылар күнімен құттықтауы
Құрметті құрылыс саласының қызметкерлері мен ардагерлері!
Ақмола облыстық мәслихаты депутаттарының атынан сіздерді кәсіби мерекелеріңіз - Құрылысшылар күнімен құттықтаймын!
Құрылыс саласы бұрынғы заманнан бері мемлекеттің дамуының негізгі тіректерінің бірі болып келе жатыр. Сіздердің кәсібиліктеріңіз, жауапкершіліктеріңіз және өз істеріңізге деген адалдықтарыңыздың арқасында тұрғын үйлер, мектептер, ауруханалар, мәдениет және спорт нысандары бой көтеріп, жолдар салынып, инженерлік инфрақұрылым дамып, қалалар мен ауылдардың келбеті жаңаруда. Сіздердің еңбектеріңіз адамдардың жайлы әрі заманауи ортада өмір сүруіне мүмкіндік беріп, экономиканың дамуына және халықтың өмір сүру сапасының артуына жол ашады.
Соңғы жылдары Ақмола облысы құрылыс қарқыны бойынша тұрақты жоғары көрсеткіштерге қол жеткізіп келеді. 2025 жылдың қорытындысы бойынша өңір тұрғын үй құрылысының көлемі жағынан Қазақстанның солтүстік және орталық облыстары арасында көшбасшы атанды. Облыста шамамен 700 мың шаршы метр тұрғын үй пайдалануға беріліп, соның нәтижесінде 6,6 мыңнан астам отбасы өздерінің тұрғын үй жағдайын жақсартты. Сонымен қатар тұрғын үй қорын жаңғырту, инженерлік және көлік инфрақұрылымын дамыту, әлеуметтік нысандар салу және елді мекендерді абаттандыру бағытындағы жобалар қарқынды жүзеге асырылуда.
Осы жетістіктердің барлығының артында сіздер - құрылысшылар, жобалаушылар, инженерлер, сәулетшілер және саланың ардагерлері тұрсыздар. Сіздердің ерен еңбектеріңіз, терең білімдеріңіз бен мол тәжірибелеріңіз зор құрмет пен шынайы алғысқа лайық.
Депутаттық корпус атынан құрылыс саласына өмірін арнаған барша азаматтарға жасампаз еңбектері, жоғары кәсібиліктері және Ақмола облысының әлеуметтік-экономикалық дамуына қосқан үлестері үшін шынайы ризашылығымды білдіремін.
Сіздерге зор денсаулық, бақыт, бақ-береке, кәсіби табыстар, тұрақтылық пен ертеңгі күнге деген сенім тілеймін. Жобаларыңыз әрдайым табысты болып, отбасыларыңызда татулық, жылулық және молшылық болсын!
Бейбіт Жүсіпов,
Ақмола облыстық мәслихатының төрағасы