Депутаттар агроөнеркәсіп кешенін кадрлық қамтамасыз ету мәселесін көтерді
Астраханка ауылындағы агробизнес және сервис колледжі базасында Әбілқайыр Ошақбаевтың төрағалығымен аграрлық мәселелер және өңірді индустриялық-инновациялық дамыту жөніндегі тұрақты комиссиясының отырысы өтті.
Отырысқа облыстық мәслихат төрағасы Бейбіт Жүсіпов, комиссия мүшелері, облыстық білім және ауыл шаруашылығы басқармаларының өкілдері, Астрахан аудандық мәслихатының төрағасы, бизнес өкілдері, аграрлық колледждердің басшылары, сондай-ақ БАҚ өкілдері қатысты.
Кездесу мазмұнды әрі ашық диалог форматында өтті. Күн тәртібіндегі негізгі мәселелердің бірі агроөнеркәсіп кешеніндегі кадр тапшылығы және ауылдық жерлерден жастардың кетуі болды.
Бүгінде өңірдегі 27 колледждің 12-сі аграрлық сала үшін мамандар даярлайды. 2022–2023 оқу жылынан бастап кәсіпорындардың өтінімдері негізінде мақсатты мемлекеттік тапсырыс іске асырылуда: оның аясында шамамен 2000 студент білім алуда, оның ішінде 300-і әрі қарай жұмысқа орналасу мүмкіндігімен аграрлық мамандықтар бойынша.
Мамандарды даярлау сапасының көрсеткіші – олардың жұмысқа орналасу деңгейі, ол облыс бойынша шамамен 80%-ды құрайды. 2025 жылдың қорытындысы бойынша 12 колледж ауыл шаруашылығы бағыты бойынша 400-ден астам маман даярлап шығарды, олардың 310-ы жұмысқа орналасты, қалғандары оқуын жалғастыруда немесе әскери қызмет өткеруде.
Қабылданып жатқан шараларға қарамастан, ауылдық жерлерде мамандар тапшылығы әлі де сақталуда. Депутаттар бұл мәселені шешудің бірқатар жолдарын ұсынды.
Атап айтқанда, Берген Беспалинов табысты тәжірибелерді кеңінен насихаттау және ауқымды ақпараттық-түсіндіру жұмыстарын жүргізу қажеттігін атап өтті. Депутат Анар Аяпбергенова көптеген ауыл шаруашылығы тауар өндірушілері аграрлық колледждердегі мақсатты даярлау мүмкіндіктері туралы жеткілікті деңгейде хабардар емес екенін айтты. Осыған байланысты білім беру ұйымдарымен өзара іс-қимылды дер кезінде жолға қойып, олардың әлеуметтік серіктесіне айналу маңызды. Тек бірлескен жұмыс арқылы кадр даярлау жүйесін тиімді дамытуға болады, соның ішінде мектептерді ерте кәсіптік бағдар беру кезеңінен бастап тарту қажет. Бұл ұстаным колледж басшылары тарапынан қолдау тауып, олар да өз ұсыныстары мен болашақ жоспарларын ортаға салды.
Сондай-ақ депутаттар ауылдағы әлеуметтік мәселелерді шешу жастарды ауылда ұстап қалудың негізгі факторларының бірі екенін атап өтті. Инфрақұрылымды дамыту, өмір сүруге және еңбек етуге қолайлы жағдай жасау - мемлекет пен қоғамның маңызды міндеттері болып қала береді.
Отырысты қорытындылай келе, Әбілқайыр Ошақбаев аграрлық мамандықтардың тартымдылығын арттыруға, дуальды оқытуды дамытуға, білім беру ұйымдары мен ауыл шаруашылығы тауар өндірушілері арасындағы өзара байланысты нығайтуға, мамандарды ауылдық жерлерде тұрақтандыруға, сондай-ақ заманауи технологияларды ескере отырып кадрлардың біліктілігін арттыруға бағытталған жүйелі шараларды әзірлеу қажеттігін атап өтті.
Ұсынылған пікірлерді ескере отырып, облыстың агроөнеркәсіп кешенін дамыту бойынша ұсыныстар әзірленіп, оларды республикалық деңгейде қарастыру қажет болады.